Vantar bara 10 laxa uppá að árið verði annað besta

Veiðin í Húseyjakvísl er búin að vera mjög góð í sumar og veiðimenn sem hafa átt daga í ánni landað mikið af vænum laxi.

Samtals eru komnir 260 laxar en ekki hafa fengist staðfestar tölur um veidda sjóbirtinga en frá því í vor hefur mikið veiðst af vænum birting í ánni.  Laxinn hefur líka verið mjög vænn í sumar og það er það sem á eftir að toga veiðimenn í ánna á komandi sumri enda er staðan þannig hjá leigutaka að veiðimenn gætu þurft að fara á biðlista til að komast í ánna svo þeir sem hafa hug á því að veiða þarna á næsta ári þurfa að bóka sína daga fljótlega.  Síðasti veiðidagurinn er í dag og það vantar aðeins 10 laxa uppá að árið í ár verði það næstbesta í ánni en þó það náist ekki er árangur sumarsins miklu betri en menn reiknuðu með þegar ljóst var að smálaxinn myndi vanta á landsvísu.  Það kom þó ekki að sök í Húseyjakvísl því hlutfall stórlaxa er með eindæmum gott í sumar og ef smálaxinn hefði mætt í sama mæli og á venjulegu ári er líklegt að áin hefði farið yfir bestu veiðina sína.