Banabiti bóksölu?

Fjárlagafrumvarpið hefur verið í umræðunni nýverið, og sitt sýnist hverjum. Helstu neikvæðniraddirnar snúa að hækkun lægra þreps virðisaukaskatts úr 7% í 12%. Bændasamtökin, VR og ASÍ voru meðal þeirra sem vöruðu við áhrifum hækkana á matvöru. Þau rök hafa að mestu verið hrakin og verða því ekki gerð að umræðuefni hér.

Hækkun lægra þrepsins hefur þó ekki aðeins áhrif á matvöru, heldur einnig á t.d. bóksölu.

Stjórnarmanninum hefur fundist athyglisvert að fylgjast með dómsdagsspám rithöfunda, útgefenda og bóksala um áhrif hækkunarinnar. Sala bóka er þó töluvert fyrirferðarminni í þjóðhagsreikningum Íslands en sala á matvöru, en viðbrögðin frá þessum hagsmunaaðilum hafa síst verið lágværari.

Þeir hafa áhyggjur af því að hækkun virðisaukaskatts á bækur muni minnka sölu bókmennta hérlendis. Þessar áhyggjur eru eðlilegar enda myndi minni sala á bókmenntum hafa bein áhrif á tekjur þeirra sjálfra. Rökin sem þeir beita gegn hækkuninni eru þó önnur.

Hallgrímur Helgason benti á að bransinn er í mjög viðkvæmu jafnvægi sem hækkunin gæti hæglega raskað, með ófyrirsjáanlegum afleiðingum. Lesa má af orðum Hallgríms að hann telji bókaútgáfu geta lagst af ef fram fer sem horfir.

Andri Snær Magnason telur að hækkunin geti haft áhrif á eftirspurn eftir bókum, sér í lagi hjá ungu fólki, með alvarlegum afleiðingum fyrir læsi þess.

Rök Hallgríms og Andra halda þó ekki. Ekkert orsakasamband er á milli útgefinna bóka á Íslandi og virðisauka hverju sinni. Þetta er hægt að gaumgæfa á vef Hagstofu. Aðrar markaðsaðstæður, svo sem stærð markhóps og fjöldi útgefinna titla, hafa töluvert meiri áhrif á verðlag bóka og þar af leiðandi eftirspurn. Þetta sést greinilega þegar verð bóka án virðisauka er borið saman við önnur lönd.

Stjórnarmaðurinn er einhuga fylgjandi breytingunum. Það er hann þrátt fyrir að vera almennt séð ekki sérlega hrifinn af skattahækkunum og þrátt fyrir að vera sólginn í reyfara, sem hann les til jafns við ársreikninga og hagtölur.

Breytingarnar á virðisaukaskatts­kerfinu eru nauðsynlegar. Ógagnsæjum vörugjöldum er skipt út fyrir eitt skattþrep og undanþágum til sérhagsmunaaðila eytt. Auðvitað er erfitt að kyngja þessum breytingum fyrir þá sem verða fyrir þeim, en einfaldara kerfi með skilvirkari verðmyndun og meiri samkeppni er hagur okkar allra.

Stjórnarmaðurinn hnaut um auglýsingu er hann vafraði um Facebook yfir kaffinu. Fyrirsögn auglýsingarinnar var Rýmingarsala á rafbókum! Fyrir hverju átti að rýma er erfitt að segja, enda ólíklegt að rafbækurnar taki mikið pláss í hillum þessa ágæta bóksala. Stjórnarmaðurinn var þó ekki lengi að skella sér á eintak, enda 1.490 kr. fyrir Arnald gjöf en ekki gjald.

Stjórnarmaðurinn er sigldur innherji með puttann á púlsinum. Stjórnarmaðurinn skrifar í Markaðinn í Fréttablaðinu á miðvikudögum og liggur ekki á skoðunum sínum um menn og viðskiptaleg málefni.

Tweets by @stjornarmadur