Story: Vildi ekki hlaupa inn í eldinn með Gunnari

Það var mjög sérstakt að sjá Rick Story á blaðamannafundinum eftir bardagann við Gunnar Nelson. Þar fór ekki maður sem leit út fyrir að hafa lagt andstæðing sinn.

Story haltraði út úr hringnum, sá varla út um augun og leið greinilega illa á fundinum. Þrátt fyrir meiðslin var hann frábær í bardaganum gegn Gunnari og vann verðskuldað.

"Af hverju ætti ég að hlaupa inn í eldinn? Það er betra að standa fyrir utan," sagði Story aðspurður um af hverju hann hefði ekki viljað fara í gólfið með Gunnari.

Story sagðist vita vel hvar styrkleiki Gunnars lægi og því hefði hann ekki haft neinn áhuga á að fara í gólfið með Gunnari.

"Ég hef tapað allt of oft og því er hver bardagi hjá mér núna sá mikilvægasti á ferlinum. Það er alltaf vont að tapa og auðveldara að vinna," sagði Story og reyndi að glotta í kringum sársaukann.

Hann var mjög auðmjúkur eftir bardagann. Hrósaði Gunna í hástert og gerði það aftur á fundinum.

"Gunni er frábær. Þið sjáið bara á mér hvernig hann fór með mig. Ég tel mig hafa það sem þarf til að komast upp á toppinn og þetta var mikilvægt skref í rétta átt. Ég mun gera allt sem ég get til þess að verða heimsmeistari."