Markmiðin í Meistaramánuði eru mörg. Ein þeirra sem þekkir mikilvægi markmiðasetningar af eigin raun er Ragna Ingólfsdóttir, badmintonleikari og Ólympíufari.
„Já ég held að markmiðasetning hafi gert gæfumuninn hjá mér í því að fara frá því að vera góður badmintonspilari yfir í að verða afrekskona í íþróttinni. Þegar ég var lítil var ég alltaf með markmðin mín bakvið eyrað og vissi að ég stefndi á að verða ein af þeim bestu í Evrópu og að komast á Ólympíuleikana. En það var ekki fyrr en að ég byrjaði að skrifa markmiðin mín niður sem það varð áþreifanlegra hvaða markmiðum ég hafði náð hverju sinni," segir Ragna, sem er einn farsælasti badmintonspilari þjóðarinnar, margfaldur Íslandsmeistari í greininni auk þess sem hún hefur tvisvar keppt á Ólympíuleikunum fyrir Íslands hönd.
Í kjölfar Ólympíuleikanna í London árið 2012 lagði hún spaðann á hilluna, en starfar nú hjá Íþrótta- og ólympíusambandinu. Það var alltaf draumur hennar að vinna fyrir íþróttahreyfinguna og því má segja að Ragna sé hvergi hætt að setja sér markmið þó svo að íþróttaferillinn sé á enda.
„Ég hef alltaf unnið eftir markmiðum og ég fann að ég varð að halda því áfram," segir Ragna, sem tekur að sjálfsögðu þátt í Meistaramánuði.
„Ég ætla að einbeita mér að andlegu hliðinni þennan mánuðinn. Ég ætla að skrifa niður þrjá hluti sem ég er þakklát fyrir á hverju kvöldi. Svo langar mig til að bæta þolinmæðina hjá mér, sem ég vona að ég geti gert með hugleiðslu til dæmis," segir Ragna Ingólfsdóttir.
