Grunur um ebólusmit á Keflavíkurflugvelli

Klukkan 13:13 barst almannavarnadeild ríkislögreglustjóra tilkynning um að flugvél hefði lent á Keflavíkurflugvelli með veikan einstakling. Grunur lék á að um ebólu smitaðan einstakling hafi verið að ræða. Flugvélinni var lagt á flugverndarsvæði, sem er lokað svæði á Keflavíkurflugvelli. Íslenskur læknir sem fór um borð í vélina hefur staðfest að ekki er um ebólusmitaðan einstakling að ræða. Þetta kemur fram í tilkynningu frá Almannavörnum.

Unnið var eftir viðbragðsáætlun vegna ebólu sem verið hefur í vinnslu undanfarið. Sóttvarnalækni var gert viðvart sem og Landspítala og Heilbrigðisstofnun Suðurnesja. Samhæfingarstöðinni í Skógarhlíð og aðgerðastjórn í umdæmi lögreglustjórans á Suðurnesjum voru virkjaðar vegna atburðarins.

Flugvélin var frá erlendu flugfélagi og var ekki að koma frá einu af þeim þremur ríkjum þar sem ebóla er útbreidd. Maðurinn reyndist vera að koma frá Suður-Afríku og hefur verið staðfest að hann var ekki með einkenni sem samræmast ebólu.