Þessir sýna á RFF 2014

Sjö íslenskir hönnuðir koma til með að sýna á Reykjavík Fashion Festival í ár. Þeir eru Cintamani, Ella, Farmers Market, JÖR by Guðmundur Jörundsson, Magnea Einars, REY og Sigga Maija.

Hátíðin fer fram í fimmta sinn samhliða HönnunarMars, dagana 27. til 30. mars.

Reykjavík Fashion Festival var stofnað árið 2009. Markmið RFF er að markaðssetja og vekja athygli á íslenskri fatahönnun og þeirri þróun og tækifærum sem í henni felast.

Fjölda erlendra og innlendra fjölmiðla ásamt starfandi fólki í tískuiðnaðinum er boðið á hátíðina og gefst þeim tækifæri til að upplifa íslenska hönnun og kynnast hönnuðunum sjálfum.

Á meðal erlendra gesta á hátíðinni í fyrra voru Beatrice Luise Graf, tískuritstjóri þýska Vogue, Hermine Coyet Ohlén, ristjóri sænska ELLE, Signy Fardal, ritstjóri norska ELLE, og hinn heimsfrægi tískuljósmyndari Roxanne Lowit svo einhverjir séu nefndir. Hátíðinni er einnig ætlað að veita áhugafólki innsýn í heim íslenskrar tísku.

Til viðbótar verður samtímis haldin svokölluð Tískuvaka í Reykjavík en hún mun lífga upp á stræti miðborgarinnar með skemmtilegum verslunar- og tískuviðburðum.