Framleiða listaþátt á mannamáli

„Við vildum gera listaþátt á mannamáli og sýna fólki hvað það er mikil gróska í list hér í Reykjavík og úti um allt land,“ segir leik- og dagskrárgerðarkonan Margrét Þorgeirsdóttir, en Margrét og vinkona hennar til tuttugu ára, Anna Birta Tryggvadóttir, standa á bak við lista- og menningaþáttinn Lyst á list sem sýndur verður á sjónvarpsstöðinni iSTV sem fer í loftið 17. júlí.

Margrét og Anna Birta eru báðar lærðar leikkonur en ákváðu að fara út í dagskrárgerð þar sem lítið var um önnur verkefni. „Það er ekki beint verið að berja á dyrnar hjá manni með verkefnin svo við ákváðum að vera með á iSTV sem er svona grasrótarstöð en þar koma allir með sitt efni tilbúið. Ég er því núna að framleiða, dagskrárstýra og klippa svo nú er brjálað að gera,“ segir Margrét og hlær.

Hún segir að þær stöllur komi víða við í þáttunum.

„Viðmælendur okkar verða óþekktir, sjálfmenntaðir, menntaðir, þjóðþekktir og þar fram eftir götunum. Við viljum varpa ljósi á þá vinnu sem listafólk leggur á sig, til dæmis fyrir sýningu eða opnun. Þátturinn verður í raun okkar svar við því hvers vegna listafólk ætti ekki að þurfa að fá sér hefðbundna vinnu.“