Opnar sýninguna Mið-baug í gamalli fiskbúð

„Sýningin dregur hugmyndir og innblástur af reynslu minni af því að vera bæði Sílemaður og Íslendingur og dínamíkina þar á milli,“ segir Victor Ocares, sem skoðar rætur sínar í sýningunni Miðbaugur sem var opnuð á laugardaginn.

Hann nýtir sér ofhlaðin tákn úr heimi stærðfræðinnar og viðskipta og vísar í eigin sögu sem rás að stærra samhengi.

„Ég nota persónulega reynslu mína sem þessa rás að stærra samhengi og leyfði ferlinu að fara með verkin á óvæntar slóðir. Með húmor og sinnuleysi snerta verkin á hnattvæðingu, flugum og glundroðanum,“ segir Victor, léttur í bragði

Victor Ocares býr og starfar á Akureyri, en hann útskrifaðist úr Listaháskóla Íslands árið 2013. Hann hefur tekið þátt í sýningum vítt og breitt um landið.

„Sýningin er á þeirri línu sem ég hef verið að vinna áður og er framhald á sýningu sem hét REC,“ útskýrir Victor.

„Verkin sjálf eru öll unnin sérstaklega fyrir þessa sýningu og þar má telja sjö myndverk, tvo skúlptúra og eitt textílverk.“

Sýningin var opnuð eins og fyrr sagði á laugardaginn, klukkan fimm í Gallerí Harbinger, sem er tiltölulega nýstofnað gallerí.

Sýning Victors er önnur sýningin sem haldin hefur verið í galleríinu að Freyjugötu 1, þar sem áður var starfrækt fiskbúð um árabil.