Tuttugu viðburðir á Act alone á Suðureyri

Einleikjahátíðin Act alone hefst á Suðureyri í dag og stendur til 10. ágúst. Alls verður boðið upp á tuttugu viðburði og aðgangur að þeim öllum er ókeypis og öllum opinn.

Meðal einleikja sem verða sýndir á Act alone í ár má nefna Eldklerkinn með Pétri Eggerz, Grande með Hirti Jóhanni Jónssyni, Sveinsstykki Þorvalds Þorsteinssonar í flutningi Arnars Jónssonar og barnaleikritið Pétur og úlfinn með Bernd Ogrodnik.



Það verður einnig dansað á Act alone. Saga Sigurðardóttir frumflytur nýtt dansverk og Anna Richardsdóttir ætlar að taka Suðureyri í gegn með einstökum þrifagjörningi.

Tónlistin á að sjálfsögðu sína fulltrúa á hátíðinni. Stuðmaðurinn Egill Ólafsson gerir upp ferilinn í tali og tónum og gítarsnillingurinn Björn Thoroddsen verður í essinu sínu með hljóðfærið. Síðast en ekki síst verður Villi vísindamaður með vísindanámskeið fyrir krakka á öllum aldri.



Tvær nýjungar eru á Act alone í ár því í fyrsta sinn verður boðið upp á bæði myndlist og ritlist auk leiklistarinnar. Opnuð verður sýning á verkum Eddu Heiðrúnar Backman leikkonu og fulltrúar ritlistarinnar eru Eiríkur Örn Norðdahl og Ólína Þorvarðardóttir sem munu lesa upp úr verkum sínum og annarra.



Act alone var fyrst haldin árið 2004 og hefur verið haldin árlega síðan. Alls hafa verið sýnd yfir hundrað verk á hátíðinni og ávallt hefur aðgangur verið ókeypis að öllum viðburðum.