Hvar erum við stödd og hvert viljum við stefna?

„Hugmyndin að málþinginu kom upp í tengslum við afmælisárið en tónskólinn fagnar fimmtíu ára afmæli í ár. Á málþinginu förum við til dæmis yfir hvar við erum stödd og hvert við viljum stefna,“ segir Sigursveinn Magnússon, skólastjóri Tónskóla Sigursveins.

Málþingið Bágt eiga þeir sem deyja með alla sína söngva ósungna verður haldið í skólanum á morgun og halda margir fyrirlesarar tölu á þinginu. Aðalfyrirlesarinn er Robert Faulkner sem kemur frá Ástralíu þar sem hann starfar við rannsóknir og kennslu á tónlistaruppeldi.

„Þessi hópur mun horfa á skólana frá ólíkum sjónarhornum. Aðallega er vinnan á málþinginu samt tvíþætt. Annars vegar að skoða starfið og gildin þess, kennsluna og hvað við getum gert betur og hins vegar er sá stjórnsýslurammi sem tónlistarskólarnir hvíla í skoðaður. Staða skólanna er að mörgu leyti svolítið skrýtin og það vantar að einhver aðili taki ábyrgð á því starfi sem þar er unnið. Þó sveitarfélögin beri áyrgð þá vísa þau vissum málum frá sér. Því erum við hrædd um að þetta kerfi sem skólarnir hvíla í, skipulagslega séð, geti líðist í sundur. Við viljum í raun kanna hvernig við getum tryggt að skólarnir hafi starfsöryggi og sinn sess í þessu menntakerfi,“ segir Sigursveinn. Þessi vinna sem hann lýsir verður ekki einskorðuð við málþingið.

„Hugmyndin er sú að áhugahópur vinni úr niðurstöðum málþingsins og að stjórnvöld geti haft hliðsjón af því sem þar kemur fram. Við viljum að það verði framhald á þessari vinnu og að málið endi ekki þegar við slítum þinginu í dag.“

Tónskóli Sigursveins var stofnaður þann 30. mars árið 1964 og forgöngu að stofnun hans hafði Sigursveinn D. Kristinsson, tónskáld. Tónskólinn hélt afmælishátíð í Hörpu í lok mars síðastliðnum en lokahnykkur í afmælisfögnuðinum verður útgáfa ævisögu Sigursveins. Bókin er gefin út af Íslenska bókmenntafélaginu síðar í haust og er það Árni Björnsson sem hefur skráð sögu tónskáldsins.

„Þetta er búið að vera mjög ánægjulegt og skemmtilegt ár þar sem allir hafa lagst á eitt að láta allt það takast sem við réðumst í,“ segir Sigursveinn, spenntur fyrir málþingi dagsins í dag.