Líður eins og kvæntum manni

Leikarinn Brad Pitt segist hafa breyst eftir að hann gekk að eiga Angelinu Jolie í ágúst.

Parið gekk í hjónaband eftir níu ára samband en þau hafa staðið í ströngu undanfarin ár við að ala upp sex börn, Maddox, Pax, Zahara, Shiloh og tvíburana Knox og Vivienne.

„Við eigum sex börn og þess vegna fannst okkur við ekki þurfa á hjónabandi að halda. En krakkarnir voru alltaf að spyrja okkur og okkur fannst fallegt að gera þetta, bæði fyrir þau og fyrir okkur sem fjölskyldu,“ sagði Pitt, en nýjasta mynd hans nefnist Fury.

„En áhrifin sem giftingin hafði á mig komu mér á óvart. Þetta var meira en bara athöfn, þetta var djúp skuldbinding. Mér líður virkilega eins og kvæntum manni.“

Þrátt fyrir að vera tólf árum eldri en Jolie segir Pitt það ekki skipta neinu máli. „Við erum líklega á svipuðu reki hvað þroska varðar,“ segir leikarinn.