Þetta er mitt abstrakt-DNA

„Ég vil frekar að listaverkin tali sínu máli en að ég sé að lýsa þeim í orðum. Allir einstaklingar eiga sitt abstrakt DNA og þetta er mitt,“ segir Búi Kristjánsson myndlistarmaður, þegar hann er spurður út í sýninguna sem hann opnar í Smiðjunni listhúsi í Ármúla 36 í kvöld klukkan 20.



Hann kveðst ekki sækja myndefnið í umhverfið eða annað sem auga hans nemi heldur leiti hann inn á við, í undirmeðvitundina.

„Því skíri ég ekki myndirnar heldur gef þeim númer eftir því hvenær hugmyndirnar koma til mín. Þannig verða þær í sjálfu sér að einu konseptverki sem á sér upphaf og ég er ekki farinn að sjá fyrir endann á því,“ útskýrir hann.

Búi hóf myndlistarnám á listasviði FB og hefur síðan lokið námi við Myndlista-og handíðaskólann, Tækniskólann og Háskólann í Reykjavík. Hann hefur haldið tvær sýningar í New York og eina í London á síðustu 18 mánuðum.