Stattu upp fyrir sjálfum þér

Þó nokkur athygli hefur beinst að kyrrsetu undanfarin misseri og virðist sem sífellt sé að koma í ljós hversu slæm áhrif hún hefur á andlega og líkamlega heilsu okkar.

Kyrrseta getur aukið líkur á hjarta- og kransæðasjúkdómum, heilablóðfalli, sykursýki-2 svo ekki sé minnst á geðraskanir eins og þunglyndi og kvíða. Ef við skoðum meðalmanneskju sem vinnur á skrifstofu þá situr hún í að minnsta kosti átta klukkustundir á dag og það fyrir framan tölvuskjá, sem er svo annar kapítuli fyrir sig. Hún skríður heim eftir vinnu, eldar, klárar önnur heimilisstörf og leggst svo jafnvel fyrir framan sjónvarpið. Að því loknu leggst hún til hvílu í að meðaltali átta klukkustundir. Svona líða dagarnir, vikurnar og mánuðirnir.

Ef þú skellir þér svo í ræktina tvisvar til þrisvar í viku þá er sá tími bara brotabrot á móti þeim stundum sem þú situr.

Til þess að brjóta upp þennan leiðindavana og taka heilsuna föstum tökum eru hér nokkur atriði sem gott er að hafa í huga þegar tekist er á við breytingar til batnaðar:

1.Gerðu þér grein fyrir því hvað þú situr mikið og reyndu að stytta þann tíma.



2.Notaðu hluta af hádegishléinu til þess að fara út að ganga eða fara í ræktina, jafnvel þó að það sé ekki nema í stutta stund þá hefur það heilmikið að segja og skiptir máli. Fáðu vinnufélaga með þér.



3.Stattu reglulega upp frá tölvunni, náðu þér í vatn, farðu út í nokkrar mínútur og fáðu þér ferskt loft, teygðu þig.

4.Fáðu fjölskylduna með þér í þrjátíu mínútna göngutúr strax eftir matinn. Fjölskyldan verður samstundis ferskari og samrýndari.