Setti Íslandsmet í þremur ólíkum greinum á einum mánuði

FH-ingurinn Þórdís Eva Steinsdóttir heldur áfram að gera það gott. Þórdís bætti nú síðast Íslandsmetið í flokki fjórtán ára og yngri í þrístökki þegar hún stökk 11,38 metra á fyrsta jóla Coca-Cola-móti FH.

Þórdís Eva bætti þá met Örnu Stefaníu Guðmundsdóttur frá árinu 2009 um fimm sentímetra. Á síðastliðnum mánuði hefur Þórdís Eva þar með sett Íslandsmet í 200 metra hlaupi, í 1.500 metra hlaupi og í þrístökki eins og fram kemur á heimasíðu FRÍ.

Þórdís Eva hljóp 200 metrana á 25,32 sekúndum 15. nóvember og bætti síðan tvö met Anítu Hinriksdóttur í 1.500 metra flokki (í flokki 14 og 15 ára) með því að koma í mark á 4:43,23 mínútum. Þórdís er þar með búin að bæta met í þremur ólíkum greinum á einum mánuði og hefur alls sett meira en 40 aldursflokkamet á árinu.