Sigmundur Már dæmir á EM 2015

Sigmundur Már Herbertsson, körfuboltadómari, dæmir á EM 2015 sem fram fer í haust, en þetta kemur fram á heimasíðu KKÍ.

„Þessi útnefning er mikil viðurkenning fyrir íslenskan körfuknattleik og íslenska dómara og er því enn einn nýr kaflinn skrifaður í körfuknattleikssögu Íslands,“ segir í frétt körfuknattleikssambandsins.

Þetta er í fyrsta sinn sem íslenskur dómari dæmir á lokamóti A-landsliða hjá FIBA. Sigmundur hefur undanfarin ár dæmt í evrópukeppnum félagsliða og lokamótum yngri landsliða.

Óvíst er hvar Sigmundur mun dæma, en ljóst er að það verður ekki í Berlín þar sem riðill íslenska liðsins verður spilaður. Hann mun dæma í Frakklandi, Lettlandi eða Króatíu.