Umhverfisvænt kynlíf

sigga dögg skrifar 4. mars 2015 09:00

Kynlífið getur líka verið umhverfisvænt Vísir/Getty

Umhverfisvitund er alltaf að aukast og þar er kynlífið enginn eftirlegu kind.

Þetta kann að hljóma nýstárlega í eyrum margra er "ecosex" er orðið vaxandi leitaryrði á stefnumóta síðum og eru meira að segja haldin málþing um hvernig megi gera kynlífið umhverfisvænna.

Umhverfisstofnun bendir á nokkra áhugaverða hluti um grænt kynlíf:

Grænn og heilsusamlegur lífsstíll hjálpar til við að viðhalda lönguninni í amstri nútímans. Athöfnin sjálf er líka góð líkamsrækt! Auk þess hafa rannsóknir sýnt að kynlíf sé samofið vellíðan og hamingjuríku lífi.
Veldu náttúrulega gúmmísmokka fram yfir þá sem ekki brotna niður í náttúrunni, ef slíkt býðst. Árlega eru notaðir um 10 milljarðar smokka árlega í heiminum sem enda í heimilissorpinu.
Pillan umbylti samfélaginu á sínum tíma. Nú hefur það sýnt sig að hormónaraskandi efni úr pillunni berast í skólpið og út í hringrás vatnsins og hafa áhrif á kynþroska karlfiska.
Sleipiefni eru af ýmsum gerðum en í fæstum tilvikum lífræn og sumar gerðir hafa ekki einu sinni innihaldslista. Sleipiefnin geta verið unnin úr jarðolíu, fitu, plastefnum, og innihalda jafnvel efni sem talin eru geta raskað hormónajafnvægi í líkamanum.
Leikföngin eru misjöfn að gæðum og gerðum. Því miður er meirihluti þeirra gerður úr PVC plasti sem inniheldur þalöt sem eru hormónaraskandi og vinyl klóríð sem er krabbameinsvaldandi. Við framleiðslu og brennslu á PVC losnar eitt af skaðlegustu efnum sem til eru, díoxín. Ýmis leikföng eru framleidd úr gleri sem er mun umhverfisvænni kostur. Veljið endurhlaðanlegar eða Svansmerktar rafhlöður í rafknúin leiktæki

Nú þegar þú hefur orðið þér úti um lífrænt sleipiefni, titrara úr gleri (athugið, EKKI nota gosflösku því innsetning á slíku getur myndað sog og flaskan festist inni í viðkomandi) nú eða notar bara eitthvað úr grænmetisskúffunni þá er um að gera að henda ekki gamla titraranum heldur endurvinna hann.

Ef þú ert að endurskoða lífstílinn þinn og reyna taka meira tillit til umhverfisins, ekki gleyma kynlífinu!