Góðgerðarsjóður Clinton vill ekki peninga frá hverjum sem er

Góðgerðarsjóður Bill Clinton, fyrrverandi forseta Bandaríkjanna, hefur sett takmarkanir á hvaða þjóðir mega styrkja sjóðinn. Aðeins er tekið við framlögum frá sex þjóðum sem þykja óumdeildar í afstöðu sinni til mannréttinda.

Ákvörðunin er tekin í beinu framhaldi af því að eiginkona hans, Hillary Clinton, fyrrverandi utanríkisráðherra, tilkynnti um framboð sitt til forseta. Hún sat í stjórn góðgerðarsjóðsins allt þangað til í síðustu viku.

Sjóðurinn hefur verið gagnrýndur fyrir að taka við fjárframlögum frá ríkisstjórnum í Mið-Austurlöndum þar sem mannréttindi eru ekki virt og kúgun kvenna látin viðgangast. Hefur það verið notað af andstæðingum Hillary í aðdraganda framboðs hennar.

Samkvæmt AP fréttastofunni verður stjórnvöldum í Ástralíu, Kanada, Þýskalandi, Hollandi, Noregi og Bretlandi áfram heimilt að gefa fé til sjóðsins. Þessi lönd hafa áður styrkt sjóðinn.

Auk þeirra hafa stjórnvöld í Sádi Arabíu, Katar, Óman, Sameinuðu arabísku furstadæmunum, Alsír, Kúveit, Ítalíu, Brúnei, Taívan og Dóminíska lýðveldið styrkt sjóðinn. Ekki verður tekið við framlögum frá þeim ríkjum hér eftir.