Líflegar opnanir gefa fyrirheit um gott laxasumar

Það var mikil spenna í loftinu á föstudaginn þegar Norðurá, Blanda og Straumarnir opnuðu fyrir veiðimönnum.

Spennan var þó lævi blönduð því síðasta sumar situr ennþá í mörgum enda var það lélegasta sumar síðan skráningar hófust á laxveiði hér á landi.  Opnanir ánna geta oft gefið smá fyrirheit um sumarið og miðað við hvernig árnar opnuðu á föstudaginn er mikill léttir yfir veiðimönnum því það virðist stefna í gott sumar.

Opnunardagurinn í Blöndu gaf 8 laxa, 4 tóku á Breiðunni og 4 í damminum.  Þetta var allt fiskur á bilinu 76-85 sm eins og veiðimenn eru vanir að sjá.  Í Norðurá komu 12 laxar á land en þar var nokkuð líf á hefðbundnum veiðistöðum sem sýnir glögglega að það er lax að ganga af mun meiri krafti en á sama tíma í fyrra. Straumarnir opnuðu líka á sama tíma en okkur hefur ekki tekist að fá fréttir þaðan.  Núna opna árnar hver af annari og ef veiðin í þeim fyrstu dagana verður í lagi á það eftir að ýta hresslilega vel við þeim veiðimönnum sem ákváðu að sitja á sér þangað til það kæmi einhver mynd á veiðina í sumar.  Sýnishornið af sumrinu virðist sýna að það stefni í mun betra sumar en í fyrra.