Titillinn tekinn af Arnari

Stjórn Frjálsíþróttasambands Íslands tók í gær fyrir umdeilt mál sem kom upp á Íslandsmeistaramótinu í 5km götuhlaupi karla.

Arnar Pétursson varð þá Íslandsmeistari en myndbandsupptökur sýndu að hann stytti sér leið á lokasprettinum.

Ingvar Hjartarson mátti sjá á eftir titlinum. Hann var ekki sáttur og kærði hlaupið. Nú er Laganefnd FRÍ loksins búið að taka málið fyrir og úrskurða.

„Að mati laganefndar er það augljóst að brautin sem mæld var og mörkuð í umræddu hlaupi gerði ráð fyrir því að hlaupið væri á götunni á þessum tiltekna stað og að keppandinn Arnar Pétursson hafi því, með því að hlaupa yfir hinn steypta kant, farið út fyrir mælda og markaða braut keppninnar. Ef hlaupa skal á gangstígum og hjólastígum, skal það vera sérstaklega merkt, sem var ekki í þessu tilviki," segir meðal annars í úrskurðinum.

Kæra má þennan úrskurð til dómstóls ÍSÍ. Úrskurðinn og fréttatilkynningu FRÍ má sjá í heild sinni hér að neðan.

Stjórn Frjálsíþróttasambandsa Íslands tók til umræðu á stjórnarfundi í gær álit Laganefndar FRÍ vegna kæru Ingvars Hjartarsonar á atviki sem átti sér stað í síðustu beygju á Meistaramóti Íslands í 5km götuhlaupi.

Laganefndin skilaði áliti sínu einróma og setur það fram í fimm köflum. Útdáttur úr áliti laganefndar í tveimur köflum af fimm er birtur hér að neðan til skýringar á úrskurði stjórnar FRÍ um að árangur Arnars Péturssonar í hlaupinu verði fjarlægður úr afrekaskrá FRÍ og samhliða úrskurðar stjórn FRÍ að Ingvar Hjartarson er Íslandsmeistari í 5km götuhlaupi karla 2015.

1. Í fyrsta kafla kemur eftirfarandi fram:  „ ....það er það mat laganefndar að stjórn FRÍ ætti að taka kæruna til efnislegrar meðferðar og úrskurða í henni.“

2. Í kærunni er vísað til myndbands sem birt var á vef RÚV af hinu kærða atviki og hefur laganefnd lagt þá upptöku til grundvallar við mat sitt á atvikinu.

2.1. „ Að mati laganefndar er það augljóst að brautin sem mæld var og mörkuð í umræddu hlaupi gerði ráð fyrir því að hlaupið væri á götunni á þessum tiltekna stað og að keppandinn Arnar Pétursson hafi því, með því að hlaupa yfir hinn steypta kant, farið út fyrir mælda og markaða braut keppninnar. Ef hlaupa skal á gangstígum og hjólastígum, skal það vera sérstaklega merkt, sem var ekki í þessu tilviki.“

2.2. Í IAAF reglu 240.10 segir:

„If the Referee is satisfied on the report of a Judge or Umpire or otherwise that an athlete has left the marked course thereby shortening the distance to be covered, he shall be disqualified.“

„Það er mat laganefndar, að hið kærða atvik megi færa undir þessa gr. enda sýnilegt að leið hlauparans styttist nokkuð við atvikið og hefði því að mati laganefndar átt að vísa honum úr keppni vegna þess.“

2.3. „Það liggur fyrir að ekki var tekið á atvikinu í keppninni, árangur Arnars Péturssonar var viðurkenndur og stendur nú í afrekaskrá FRÍ.“

„Að mati laganefndar ætti stjórn að hafa til hliðsjónar það meginsjónarmið að árangri sem skráður er af hálfu sambandsins sé sannarlega náð í samræmi við gildandi reglur viðkomandi keppnisgreinar og að verðlaun og titlar séu aðeins veittir á grundvelli slíks árangurs.“

„Laganefnd telur að það séu hagsmunir íþróttarinnar og frjálsíþróttahreyfingarinnar í heild, sem og einstakra keppenda, að skráður árangur og veiting verðlauna og titla sé jafnan hafin yfir vafa.“

2.4. „Að mati laganefndar gerðist Arnar Pétursson, í umræddu hlaupi, brotlegur við gr. 240.9 í keppnisreglum IAAF, sem skv. gr. 240.10 varðar brottrekstri.“

Laganefnd ítrekar að úrskurði stjórn í málinu, sé sá úrskurður kæranlegur til dómstóls ÍSÍ sbr. 1. mgr. 25. gr. laga FRÍ. Því verður að tilkynna kæranda og hinum kærða formlega um úrskurð stjórnar strax þegar hann liggur fyrir.

F.h. stjórnar FRÍ

Virðingarfyllst,

Einar Vilhjálmsson

Má stytta sér leið í svona götuhlaupi?????

Posted by Óskar Hlynsson on Monday, April 27, 2015

>/center>