Byggingarkranar syngja og dansa

„Ég er alltaf að vinna með umhverfi mitt og byggingarkranar eru áberandi þar,“ segir Ragnheiður Harpa Leifsdóttir sviðslistakona, spurð hvernig hugmyndin að dansverkinu Söng krananna hafi kviknað.

Verkið verður sýnt tvívegis úti við Gróttu í dag, klukkan 17 og 21, og tekur 12 mínútur í flutningi.

Ragnheiður Harpa hefur unnið að undirbúningi sýningarinnar, ásamt  Ásrúnu Magnúsdóttur danshöfundi, Jóni Erni Bergssyni kranamanni og Elvari Sævarssyni og Guðmundi Vigni Karlssyni hljóðmönnum.

Kranarnir tveir sem eru í aðalhlutverkum verða á landfyllingunni við Gróttu, með haf og fjöll sem baktjald. „Þeir skipta um takt og tempó, ýmist saman eða hvor í sínu lagi,“ segir höfundurinn og undirstrikar að ákveðin meining sé á bak við hreyfingar þessara stórvirku tækja í náttúrunni.

„Kranar eru framlenging á manneskjunni og geta verið náttúrunni bæði til góðs og ills eftir hlutverki þeirra hverju sinni. Þeir eru líka mælikvarði á fjármagn til framkvæmda í þjóðfélaginu.  Ég vona að verkið veki spurningar um hvert við viljum stefna því ábyrgð okkar er mikil gagnvart umhverfinu.“

Ragnheiður Harpa segir söng og dans samofna í gjörninginn. „Þetta verður kranahugleiðsla sem opnar andann fyrir því hvernig við upplifum dansinn sem áframhald. Ég held að krakkar elski þetta verk. Börn eru svo hrifin af stórum hlutum.“

Verkið er hluti af bæjarhátíð Seltjarnarness auk þess að tilheyra Lókal og Reykjavík Dansfestivali. Lausnir lánuðu kranana.