Meintur nauðgari sendur í leyfi

Starfsmaður hótelsins Reykjavík Marina, sem grunaður er um aðild að hrottalegri nauðgun á konu í félagi við annan mann, hefur verið sendur í leyfi frá fyrirtækinu. Hann starfar á skrifstofu fyrirtækisins.

Um leið og hótelið fékk veður af málinu var maðurinn sendur í leyfi. Samkvæmt heimildum fréttastofu hefur verið kannað hvort upptökur úr öryggismyndavélum hótelsins væru til frá umræddu kvöldi, en búið var að eyða þeim. Slíkar upptöku eru aðeins geymdar í tiltekinn tíma.

Greint var frá því í Fréttablaðinu að búið væri að leggja fram kærur á hendur tveimur karlmönnum sem grunaðir eru um að hafa nauðgað tveimur konum. Annar mannanna er á fertugsaldri og er nemandi við frumgreinadeild Háskólans í Reykjavík. Hinn er á svipuðum aldri.

Þá segir jafnframt í Fréttablaðinu í dag að annarri konunni hafi verið nauðgað af bekkjabróður sínum í HR en hinni síðari af báðum mönnunum. Í báðum tilvikum eiga meint brot að hafa átt sér stað eftir bekkjarskemmtanir í miðbæ Reykjavíkur, aðra og þriðju helgina í október, á skemmtistaðnum Austur og á Slippbarnum, sem er hótelbar Reykjavík Marina.

Starfsmaður hótelsins var þó ekki á vakt umrætt kvöld en mennirnir eiga að hafa farið með aðra konuna í heimahús í Hlíðunum síðar um kvöldið og hún verið í annarlegu ástandi. Samkvæmt upplýsingum frá nemendum leikur grunur á að meintir gerendur hafi byrlað konunni ólyfjan og beitt hana kynferðislegu og öðru líkamlegu ofbeldi. Lögregla hefur varist allra fregna af málinu en staðfestir þó að það sé til rannsóknar.