Tónninn færir fólk til Írlands í fornöld

„Þema tónleikanna er keltensk jólatónlist í bland við íslenska,“ segir Hilmar Agnar Agnarsson um aðventutónleika Söngfjelagsins í Langholtskirkju á morgun, sunnudag, klukkan 16 og 20.

 Hljóðfæraskipan er með fjölbreyttasta móti því leikið verður á keltnesk hljóðfæri, meðal annars þjóðarhljóðfæri Íra, svonefnda uilleann sekkjapípu. 

„Við erum búin að leita og leita að þessari írsku sekkjarpípu, hún er svo sérstök og það eru svo fáir sem geta spilað á hana í heiminum,“ lýsir Hilmar Örn og bætir við kampakátur.

 „Svo bara fann ég hana uppi á Skaga, þar býr stúlka sem á þetta hljóðfæri, Íri frá Dublin.  Um leið og fólk heyrir tóninn þá er það komið til Írlands í fornöld.“

Auk sekkjapípunnar einstöku verður leikið á keltneska hörpu, trommu, fiðlu, mandólín, orgel, gítar og margar gerðir flauta.

Sérstakir gestir tónleikanna eru írsku söngkonurnar Regina McDonald og Bláth Conroy Murphy úr hinum heimsþekkta sönghópi Anúna, sópransöngkonan Björg Þórhallsdóttir og sönghópurinn Vox Populi.

„Það er Söngfjelaginu sérstakur heiður að fá liðsauka frá Anúna. Nær öll verkin sem hópurinn flytur eru sérsamin eða útsett fyrir hópinn af Michael McGlynn,“ segir Hilmar Örn.

Eins og hefð er fyrir frumflytur Söngfjelagið nýtt jólalag á tónleikunum. Að þessu sinni er það kórfélaginn Hjörleifur Hjartarson, einnig þekktur sem helmingurinn af dúóinu Hundur í óskilum, sem á heiðurinn að því en Haraldur V. Sveinbjörnsson útsetti lagið.

Svo spillir ekki stemningunni að tónleikagestum gefst færi á að syngja með í völdum lögum.