Syngja á svölum Caruso

Við munum syngja jólalög fyrir gesti miðbæjarins og hlökkum mikið til,“ segir Sigríður Ósk Kristjánsdóttir, ein þeirra þriggja söngdíva sem koma fram á svalir Caruso við Austurstræti 22 klukkan 21 í kvöld og láta raddir sínar hljóma. Þær ætla að halda uppi stemningu í miðbænum og koma þeim í ekta jólaskap sem ekki eru það fyrir en festa það rækilega í sessi hjá hinum.

Dagskráin er falleg að sögn söngkvennanna. Sálmar og jólalög í góðum kokteil. Meðal þess sem þær nefna er hinn hátíðlegi sálmur Nóttin var sú ágæt ein eftir Sigvalda Kaldalóns og Einar Sigurðsson, Pie Jesu eftir söngleikjahöfundinn Andrew Lloyd Webber og hið sígilda íslenska jólalag Það á að gefa börnum brauð. „Við syngjum raddað, skiptumst á að vera í aðalhlutverki og reynum að hafa flutninginn sem fjölbreyttastan,“ segir Sigríður Ósk.

Það er Reykjavíkurborg sem stendur fyrir söng dívanna í Austurstræti í kvöld. Undanfarin ár hafa þrír tenórar oft komið fram á svölum Sólons í Bankastræti en að þessu sinni var ákveðið að breyta til. „Kannski vorum við valdar í tilefni af hundrað ára kosningaafmæli kvenna á árinu,“ segir Sigríður Ósk. „Þetta er að minnsta kosti í fyrsta skipti sem söngkonur koma fram í miðbænum á Þorláksmessukvöldi.  Nú eru nýir tímar.“