Stórt framfaraskref fyrir bæði Hof og Hörpu

Í gær var undirritaður samstarfsamningur um menningarbrú á milli Hörpu í Reykjavík og Hofs á Akureyri. Stjórn Hörpu tónlistar- og ráðstefnuhúss og stjórn Menningarfélags Akureyrar (MAk) fyrir hönd menningarhússins Hofs standa að samningnum sem er liður í viðleitni menningarhúsanna beggja til að efla menningarstarf og auka sýnileika menningarframleiðslu um allt land.

Þorvaldur Bjarni Þorvaldsson, sem er yfirmaður tónlistarsviðs Menningarfélags Akureyrar, segir að í fyrsta lagi sé verið að auðvelda listamönnum sem starfa innan þessara tveggja húsa að geta verið báðum megin. „Við gerum samkomulag um fimmtíu prósent á leigu. Þannig að ég t.d. get farið með sinfóníuhljómsveit til Reykjavíkur án þess að fara á hausinn. Og ef ég er með markaðslega sterk verkefni eins og Dimmu og sinfóníuna um daginn þá er þetta bara mjög vel gerlegt og getur komið afar vel út. Eins var það með Þetta er grín, án djóks á vegum Leikfélags Akureyrar um daginn. En báðir þessir viðburðir tókust einstaklega vel bæði listrænt og markaðslega séð. Núna er þetta einfaldlega orðið skynsamlegur kostur að koma með framleiðslu að norðan og sýna fyrir sunnan.“

Framundan er stórsýningin Píla Pína í Hofi og Þorvaldur segir að þar sé á ferðinni fyrsta sýningin þar sem allar þrjár einingar MAK koma saman. „Þetta er fyrsta tilraunin í þessu að MAK í heild framleiði sýningu. Þetta er mikil hagræðing sem felst í þessu fyrir okkur fyrir norðan og svo ef vel tekst til er núna orðið möguleiki að það verði einhverjar sýningar fyrir sunnan. Eins er líka mikill ávinningur í þessu fyrir Hörpu sem á það t.d. til að sprengja utan af sér ráðstefnurnar sem þar eru haldnar, t.d. um ferðamál og annað slíkt, og þá er gott að geta leitað hingað norður.

En svo má ekki gleyma að Harpa er líka í framleiðslu, eins og t.d. rússneska ballettinum sem var þar fyrir skömmu. Með þessum samningi opnast möguleikinn á að slíkar sýningar komi norður og það er frábært fyrir Akureyringa. En svona heilt á litið má segja að þetta feli í sér fyrir bæði húsin aukningu á öllu og fólk á vonandi eftir að njóta þess bæði hér fyrir norðan og fyrir sunnan. Svo er Sinfóníuhljómsveitin inni í þessu og stefnt að því að hún komi árlega til okkar sem er líka mikið gleðiefni.“

Halldór Guðmundsson, forstjóri Hörpu, var á leiðinni í flug þegar náðist í hann en hann tekur heils hugar undir ánægjuna með þennan tímamótasamning. „Ég get varla sagt þér hvað mér finnst þetta gott mál. Það sem er meginatriði frá okkar bæjardyrum séð er að Harpa er hús allra landsmanna. Við þurfum þá líka að sýna það með einhverjum hætti og þetta er stórt skref í rétta átt til þess.“