Aron um Aron Pálmarsson: Hann er hættur að hugsa um þetta

Íslenska landsliðið heldur á morgun utan til Katar þar sem HM í handbolta hefst á fimmtudag. Strákarnir sýndu margt jákvætt á æfingamóti sem fór fram í Danmörku og Svíþjóð um helgina sem kom einna best í ljós þegar þeir gerðu sér lítið fyrir og unnu ógnarsterk lið Danmerkur í Álaborg á laugardag. Þeim var svo kippt rækilega niður á jörðina gegn Slóvenum í Árósum í gær þar sem þeir voru í miklu basli með varnarleik sinn og markvörslu.

Ísland var í miklum eltingarleik við Slóveníu en gafst þó ekki upp og fékk tækifæri til að vinna leikinn. Aron Pálmarsson átti síðasta skot leiksins en það var varið og voru leikmenn Íslands afar ósáttir við að ekki hafi verið dæmt vítakast á Slóvenana þá. En þar við sat og niðurstaðan 32-32 jafntefli.

„Við komum mjög illa inn í þann leik,“ sagði landsliðsþjálfarinn Aron Kristjánsson í samtali við Fréttablaðið eftir leikinn í gær. Slóvenía, sem hafði tapað báðum leikjum sínum á mótinu til þessa og var án leikstjórnandans Uros Zorman, byrjaði leikinn af miklum krafti og lét íslensku vörnina, sem og markverðina, líta afar illa út.

„Það vantaði allan hreyfanleika í vörnina og þeir gengu á lagið og röðuðu á okkur mörkunum. Við vorum flatir og þeir náðu að opna mikið inn á línuna. Við lásum leikinn einfaldlega ekki nógu vel,“ segir Aron en bætir við að þetta hafi batnað til muna í síðari hálfleik, ekki síst eftir að Ísland skipti yfir í 3-2-1 vörnina.

„Með henni náðum við að brjóta leikinn upp og strákarnir sýndu bæði baráttu- og sigurvilja. Vörnin þvingaði Slóvenana í ákveðin skot og Björgvin Páll kom sterkur inn og gaf okkur tækifæri á að vinna leikinn, þó svo að við þurftum á endanum að sætta okkur við jafntefli.“

Aron gerir alla betri í kringum sig

Sóknarleikurinn stórbatnaði með innkomu Arons Pálmarssonar sem var í stóru hlutverki þegar strákarnir lögðu Guðmund Guðmundsson og lærisveina hans í danska landsliðinu. Var þetta fyrsti tapleikur Danmerkur undir stjórn Guðmundar sem er ef til vill viðeigandi, enda á Guðmundur stóran þátt í íslenska liðinu eftir að hafa stýrt því um árabil með frábærum árangri.

Aron kom af miklum krafti inn í íslenska liðið eftir að hafa misst af síðustu æfingaleikjum vegna líkamsárásarinnar sem hann varð fyrir á milli jóla og nýárs. Þar kinnbeinsbrotnaði hann og fékk stóran skurð við augabrúnina.

„Þetta var bara spurning um hvað myndi gerast þegar hann fengi fyrsta skellinn,“ segir þjálfarinn. „Mér fannst Aron bregðast vel við honum. Hann finnur ekkert fyrir þessu, líður vel og segist vera hættur að hugsa um þetta. Það veit á gott,“ segir Aron og bætir við að nafni sinn hafi mikilvægu hlutverki að gegna í sóknarleik Íslands.

„Hann gerir alla betri í kringum sig og lyftir sóknarleiknum á hærra plan. Samspilið á milli hans og Alexanders [Peterssonar] verður hættulegra og það verður erfiðara fyrir andstæðingana að kortleggja okkar leik. Snorri [Steinn Guðjónsson] og Róbert [Gunnarsson] hafa vaxið líka í sínum stöðum sem skiptir miklu máli.“

Heilt yfir ágætlega sáttur

Markvarslan var afar misjöfn um helgina. Aron Rafn átti góða innkomu gegn Dönum og Björgvin Páll var frábær á lokamínútunum gegn Slóveníu. En heilt yfir vantaði of mikið upp á og Aron hefur áhyggjur af því.

„Ef við verðum á hælunum í varnarleiknum þá munum við lenda í miklum vandræðum gegn sterkum liðum. Við þurfum því að vera á tánum og þó svo að ég sé heilt yfir ágætlega sáttur þurfum við að vinna í ákveðnum þáttum fyrir fyrsta leikinn á HM [gegn Svíþjóð] og þá sérstaklega í varnarleiknum og markvörslunni,“ segir Aron.

Guðmundur Árni hélt heim

Guðmundur Árni Ólafsson kvaddi íslenska hópinn í gær en eftir standa sautján leikmenn sem halda til Katar á morgun. Guðjón Valur Sigurðsson gat ekki spilað með liðinu um helgina af persónulegum ástæðum en hittir landsliðið í Danmörku og heldur með því utan á HM.

Ástand leikmanna er einnig gott. Alexander Petersson sneri sig á ökkla gegn Danmörku en var með gegn Slóveníu í gær. Þá var Arnór Þór Gunnarsson stífur aftan í læri og hvíldi því í seinni hálfleik í gær. Aron segir þó að báðir verða klárir í slaginn þegar út í alvöruna verður komið, rétt eins og aðrir leikmenn íslenska liðsins.