Sýnishorn af myndlist kvenna

„Konur voru lítið áberandi í íslenskri myndlist framan af 19. öldinni en urðu með tímanum fullir þátttakendur,“ segir Halldór Björn Runólfsson, sýningarstjóri í Listasafni Íslands.

Tilefnið er opnun sýningarinnar Konur stíga fram sem verður opnuð þar í dag klukkan 18. Hún birtir milli 60 og 70 verk þrjátíu íslenskra listakvenna.

Þær elstu eru fæddar 1823 og 1831 og gerðu meðal annars garðinn frægan með því að kenna bæði strákum og stelpum teikningu og málaralist að sögn Halldórs Björns. Hann nefnir sem dæmi að ein þeirra hafi kennt Þórarni B. Þorlákssyni listmálara.

Öll verkin á sýningunni eru í eigu Listasafns Íslands. Þau bregða ljósi á vitundarvakningu kvenna hér á landi og baráttu þeirra fyrir aukinni hlutdeild í sögu íslenskrar myndlistar. „Við hólfum fimm og fimm konur saman eftir aldri og allar eru þær flottir kandidatar, það verður að segjast eins og er,“ segir Halldór Björn.

Yngstu konurnar í hópnum eru fæddar 1940. Sýningarstjórinn segir ekki hafa verið ástæðu til að fara nær okkur í tíma.

„Við teljum að með þeirri kynslóð hafi konur stigið skrefið til fulls og sagt: „Burt með alla kúgun, við látum ekki bjóða okkur þetta lengur.“