Hver væri versta mögulega útkoman?

Öll höfum við áhyggjur og okkar skammt af neikvæðum hugsunum. Þessar hugsanir eru manninum ekki til gagns heldur ein af hindrununum til betra lífs.

Góð vísa er sjaldan of oft kveðin og sama gildir um góðar áminningar í dagsins önn. Þrátt fyrir góðan vilja, staðfestu sem og vitund þá eigum við það til að gleyma því að vera meðvituð um eigin hugsunarhátt. Þegar eitthvað bjátar á eða kemur óvænt upp á eru neikvæðar hugsanir oft það fyrsta sem við grípum í. Kenna öðrum um eigin ófarir eða valkosti. Neikvæðar hugsanir halda okkur föngnum, þær hafa engan áhuga á framförum eða uppbyggingu og við höfum lítil sem engin not fyrir þær. Þess má þó geta að neikvæðar hugsanir eiga ekkert skylt við gagnrýna hugsun sem er hverjum viti bornum manni nauðsynleg til þess hreinlega að lifa af.

Við skulum samt sem áður aðeins kafa dýpra í neikvæðar hugsanir. Rannsóknir sýna að 85% af þeim áhyggjum sem við höfum af einhverju í framtíðinni endar í rauninni á því að verða jákvæð eða hlutlaus útkoma. Í þeim tilfellum sem þær áhyggjur, sem við höfðum, eiga við rök að styðjast og aðstæður eru á versta veginn þá er manneskjan þannig gerð að í flestum tilfellum ráðum við betur við þær en við héldum í fyrstu.

Gárungar segja að það taki þrjár vikur að venja sig á góða siði eða venja sig af þeim vondu.

Prófið að vera meðvituð um eigin hugsanir frá og með deginum í dag og notið eftirfarandi ráð til aðstoðar við að venja ykkur af óþarfa og neikvæðum hugsunum:

- Ekki taka öllu persónulega, við lendum öll í óheppilegum aðstæðum en heimurinn er ekki að refsa þér. Stundum erum við bara óheppin.

- Ímyndaðu þér hver væri versta mögulega útkoman og veltu því fyrir þér hvað þú myndir gera þá, hvaða tæki þarftu til þess að leysa vandamálið og hvernig myndirðu gera það? Hugsaðu rökrétt, neikvæðar hugsanir eru oft og tíðum afrakstur af frjóu ímyndunarafli.

- Settu þér jákvæð og uppbyggileg markmið og stefndu í þá átt. Það munu alltaf vera hindranir, ákveddu að leysa vandamálin með jákvæðu hugarfari.

- Hjálpaðu öðrum og hrósaðu af einlægni, það er svo gott fyrir hjartað.

- Skrifaðu niður þær áhyggjur sem þú hefur, rífðu blaðið og hentu því í ruslið. Það er ótrúlegt hvað þessi aðferð hefur mikil áhrif.