Aníta gæti verið nálægt verðlaunapallinum í Prag

Aníta Hinriksdóttir er nýorðin nítján ára en hún er þrátt fyrir ungan aldur mætt á sitt fjórða stórmót fullorðinna. Gunnar Páll Jóakimsson, þjálfari Anítu Hinriksdóttur, er með henni úti á EM í Prag og honum lýst vel á stöðuna á vonarstjörnu Íslands á Evrópumótinu í ár.

„Hún er bara tilbúin í slaginn. Við vorum niðri í höll í morgun og það eru mættar hingað mjög margar sem við þekkjum og hún hefur keppt við áður. Þetta verður skemmtilegt barátta. Riðlakeppnin byrjar á morgun (í dag) og það er ekkert annað en hlaupa þannig hlaup að hún komist örugglega áfram. Undirbúningurinn hefur gengið vel og hún á að vera í góðu standi til þess,“ segir Gunnar Páll.

Aníta keppti líka EM innanhúss fyrir tveimur árum þar sem hún varð í 11. sæti. Hún varð einnig í 11. sæti á HM innanhúss 2014.

Að standast pressuna

„Hún er að fá meiri reynslu í þessu og verður því að standa undir þeirri pressu núna að vera ein af þeim sem á alla möguleika til þess að komast örugglega áfram,“ segir Gunnar Páll.

Aníta keppir í undanrásum í dag og þar sem hún reynir að tryggja sér sæti í undanúrslitunum sem fara síðan fram á morgun. Úrslitahlaupið er draumurinn en það fer fram á sunnudaginn.

Aníta er ein af fjórum íslenskum keppendum sem hefja keppni í dag og Gunnar Páll er á því að það hafi góð áhrif á Anítu að íslenski hópurinn á mótinu sé svona stór.

„Það er mjög skemmtilegt. Það er samstaða í hópnum og þetta dreifir álaginu og gerir spennustigið aðeins lægra. Það er allt annað að vera með hóp með sér, “ segir Gunnar.

Gunnar Páll segir að Aníta þurfi að gera betur en á mótinu í Birmingham á dögunum.

„Það gekk ekki alveg nógu vel á mótinu í Birmingham fyrir tveimur vikum en ég held að það hafi verið góð reynsla í undirbúningnum. Þar var hún í fimmta sæti en við hefðum viljað vera í öðru til þriðja sæti þar,“ segir Gunnar Páll og nefnir til nokkrar stelpur sem voru þar á undan Anítu. Besti tími Anítu á árinu er Íslandsmet hennar frá því á Stórmóti ÍR í janúar (2:01,77 mínútur).

Ein sem féll er komin aftur

„Hún þarf að byrja á því að tryggja sig inn í undanúrslitin og þá er allt opið,“ segir Gunnar Páll en Aníta er með þriðja besta tíma ársins af þeim sem eru skráðar til leiks.

„Það eru þarna þrjár til alls líklegar af þeim sem eru ekki búnar að hlaupa hraðar en Aníta núna og ein af þeim er hin úkraínska Lupu sem hefur alltaf verið mjög sterk. Hún féll á lyfjaprófi en er komin inn aftur,“ segir Gunnar Páll sem sér fram á jafna baráttu.

„Það eru sex til átta sem eru mjög jafnar. Jenny Meadows er með áberandi langbesta tímann og það eru síðan tvær til þrjár sem eru með meiri reynslu en Aníta en þær eru ekki endilega sterkari. Svo eru aðrar tvær til þrjár sem eru með aðeins lakari tíma en Aníta en verða mjög skeinuhættar. Það eru því fimm til sex fyrir utan Jennu Meadows sem ættu samkvæmt pappírnum að vera að berjast um þetta,“ segir Gunnar Páll en hverjar eru væntingar hans?

„Aníta gæti verið nálægt verðlaunapalli ef allt gengur upp og hún kemst í úrslitin. Við tökum samt bara eitt skref í einu og fyrst á dagskrá er að komast í undanúrslitin,“ sagði Gunnar Páll að lokum.