Amerískar pönnukökur með bláberjasírópi

Hérna gefur Eva Laufey lesendum Lífsins frábærar uppskriftir úr þætti sínum Eldhúsið hennar Evu sem sýndur er á fimmtudagskvöldum á Stöð 2.

Amerískar pönnukökur

5 dl hveiti

3 tsk. lyftiduft

½ tsk. salt

2 egg

4 dl AB-mjólk

2-3 dl mjólk

3 msk. smjör (brætt)

1 tsk. vanilla extract eða vanillusykur

1 msk. sykur

1. Sigtið saman hveiti, lyftiduft og salt.

2. Bræðið smjör, leggið til hliðar og kælið.

3. Pískið egg og mjólk saman.

4.Næsta skref er að blanda öllum hráefnum saman í skál með sleif, ég blanda sykrinum saman við í lokin.

5.Leyfið deiginu að standa í 30-60 mínútur áður en þið steikið pönnukökurnar.

6. Hitið smá smjör á pönnukökupönnu og steikið pönnukökurnar í um mínútu eða tvær á hvorri hlið. Þær eru tilbúnar þegar þær eru gullinbrúnar.

Þetta er frábær grunnuppskrift að pönnukökum en stundum bæti ég eplum, bláberjum, bönunum eða súkkulaðispónum út í deigið. Prófið ykkur áfram með það hráefni sem ykkur finnst gott? pönnukökur eru einfaldlega ljúffengar!

Bláberjasíróp

3 dl sykur

3 dl appelsínusafi

3 dl bláber, fersk eða frosin

Rifinn börkur af hálfri sítrónu

Hitið sykur og appelsínusafa í potti þar til blandan er orðin þykk, bætið þá bláberjum og berkinum af hálfri sítrónu út í og leyfið sírópinu að malla í 30 mínútur.