Hátíð án landamæra

Framkvæmdastjóri hátíðarinnar er Íris Stefanía Skúladóttir og hún segir hátíðina hafa vaxið og dafnað nokkuð jafnt og þétt frá upphafi. „Hátíðin var fyrst haldin árið 2003 á Evrópuári fatlaðra og það var Friðrik Sigurðsson hjá Þroskahjálp sem skellti í þessa glæsilegu hátíð sem hefur verið haldin árlega síðan með einni undantekningu.

List án landamæra er í dag sjálfstæð eining með aðild sex félaga og eina manneskju í fullu starfi allt árið og fleira starfsfólk á álagstímum.“

List án landamæra 2015 var sett í gær með opnun í Ráðhúsi Reykjavíkur. Í dag verður sýningin Kirkjur og hús opnuð í Týsgalleríi. Á sunnudag verður svo samsýningin Allt og alls konar opnuð í Norræna húsinu en þar gefst gestum meðal annars kostur á að taka þátt í listsköpuninni en hátíðin stendur til 13. maí og er mikil að umsvifum.

„Við erum ákaflega stolt af því að í dag er þetta ein af stærstu hátíðum sinnar tegundar í Evrópu. Það er dálítið sérstakt vegna þess að konseptið utangarðslist er fyrir löngu orðið mjög vel þekkt í Evrópu en við virðumst ennþá vera bundnari af ýmsum ósýnilegum landamærum manna á milli hérna heima. List án landamæra er ekki aðeins fyrir alla þá listamenn sem eru innan okkar vébanda, heldur einnig þann fjölda listunnenda sem er að finna á Íslandi.

Við erum með einhver landamæri í hausnum þar sem við virðumst ósjálfrátt taka til við að skipa í flokka og skúffur. Það sem sýnir okkur hvað best fáránleikann í þessu er sá árangur sem listamenn innan okkar vébanda hafa verið að ná í menningarlífinu. Hjá okkur eru listamenn sem eru komnir á samning hjá galleríum, sýna erlendis og verk þeirra eru víða eftirsótt.

Hjá okkur kemur saman fólk með ólíkan bakgrunn og vinnur að list á jafningjagrunni. Við verðum einnig með uppboð á 40 verkum, fatlaðra sem ófatlaðra listamanna, og það er dæmi um spennandi plattform fyrir alla sem að þessu koma að ógleymdu frábæru tækifæri fyrir listunnendur til þess að koma og láta á það reyna að gera góð kaup.“