Hlakkar til að takast á við Janis Joplin

Hljómsveitin Þær og félagar, sem skipuð er þeim Þórunni Ernu Clausen, Berglindi Magnúsdóttur, Guðrúnu Árnýju Karlsdóttur, Baldri Kristjánssyni, Gunnari Leó Pálssyni og Helga Reyni Jónssyni, efnir til tónleika á síðasta degi vetrar.

„Þetta er mjög fjölbreytt og skemmtileg efnisskrá. Alveg frá svona tilfinningaríkum lögum og út í mikið stuð,“ segir Þórunn Erna glöð í bragði.

Efnisskráin stendur saman af frumsömdum lögum auk nokkurra af uppáhaldslögum þeirra. Meðal annars verða slagarar Aliciu Keys, Janis Joplin, Kings of Leon auk nokkurra Eurovision-laga tekin.

„Maður er að velja lög sem maður fær mikið út úr því að syngja,“ segir Þórunn Erna og bætir við að hún hlakki til þess að takast á við Joplin, þó hún eigi erfitt með að nefna sitt uppáhaldslag á efnisskránni.

„Ég get ekki valið, mér finnst þetta allt svo ótrúlega skemmtilegt,“ segir hún hlæjandi og lofar stórgóðri skemmtun á tónleikunum í kvöld.

Gestasöngvari er Jógvan Hansen og hefjast tónleikarnir klukkan 22.00 á Café Rósenberg í kvöld, miðaverð er 1.500 krónur.