Biblíufélag Íslands heldur upp á 200 ára afmæli

Í dag verður opnuð biblíusýning á þriðju hæð Þjóðminjasafnsins klukkan 16.00. Sýningin er samstarfsverkefni Þjóðminjasafnsins og Hins íslenska biblíufélags.

Tilefnið er 200 ára afmæli Biblíufélagsins en það er elsta starfandi félag á Íslandi og eitt af elstu biblíufélögum í heiminum. Sýningin er einnig til þess að minna á Biblíuna og íslenska tungu og menningu sem er samofin kristinni trú.

Markmið félagsins er að vinna að útgáfu og útbreiðslu Biblíunnar. Á opnuninni munu fulltrúi frá Þjóðminjasafninu og framkvæmdastjóri Hins íslenska biblíufélags halda ræðu og síðan mun Helga Vilborg Sigurjónsdóttir syngja tvö lög.

Ragnhildur Ásgeirsdóttir er framkvæmdastjóri félagsins en það hefur skipulagt fjöldann allan af uppákomum allt árið til þess að halda upp á stórafmælið. „Við vorum ein af fyrstu 20 þjóðum heims til þess að fá Biblíuna þýdda á okkar tungumál en fyrsta útgáfan var þýdd af Guðbrandi Þorlákssyni árið 1584 og var nefnd eftir honum. Hún verður meðal annars til sýnis á sýningunni ásamt nokkrum öðrum útgáfum. Biblían er mikilvægur menningararfur okkar Íslendinga enda sjást augljósar skírskotanir í hana og kristin viðhorf í menningu okkar og sögu.“

Á meðal annarra uppákoma sem verða haldnar af Biblíufélaginu í ár í tilefni afmælisins er hátíðarguðsþjónusta þann 10. júlí í Dómkirkjunni þar sem gengið verður að Aðalstræti 10, þar sem Biblíuhúsið var upprunalega, og hengdur verður skjöldur á húsið.

Aðalhátíðin verður 29. ágúst í Hallgrímskirkju. Einnig verður önnur biblíusýning á Landsbókasafninu og Viðeyjarútgáfa Biblíunnar verður gerð aðgengileg á heimasíðu Biblíufélagsins seinna á árinu.

Nú þegar hafa verið margir viðburðir á árinu og hafa tónlistarmenn samið lög í tilefni afmælisins. „Það er auðvitað merkilegt að vera elsta starfandi félagið á Íslandi og þess vegna ber okkur að halda upp á það með dagskrá sem tilheyrir þessum stóru tímamótum.“

Það eru 2.000 meðlimir í Biblíu­félaginu hér á landi. „Okkur langar að nýta þetta afmælisár og fá fleiri meðlimi með okkur enda skemmtilegt starf sem við erum með í gangi. Það er auðvelt að skrá sig í gegnum heimasíðuna okkar, biblia.is.“