Gera KR-ingar toppliði Breiðabliks aftur grikk?

Fjórir leikir eru á dagskrá Pepsi-deildar kvenna í kvöld. Topplið Breiðabliks sækir KR heim en KR-konur eru eina liðið sem hefur tekið stig af Blikum í sumar.

Liðin gerðu 1-1 jafntefli í þriðju umferð en síðan þá hefur Breiðablik unnið alla sína leiki og ekki fengið á sig mark.

Stjarnan, sem er fjórum stigum á eftir Breiðabliki, mætir Selfossi en Selfyssingar unnu Stjörnukonur í fyrri leik liðanna, 1-2.

Valskonur geta endurheimt þriðja sætið með sigri á Fylki en bæði lið eru í sárum eftir töp í undanúrslitum Borgunarbikarsins á dögunum.

Þá tekur Þróttur á móti ÍBV. Heimakonur þurfa nauðsynlega á sigri að halda en þær eru í erfiðri stöðu í næstneðsta sætinu.