Byrjað að rífa „Frumskóginn“ í Calais

Frönsk yfirvöld hófu í morgun að rífa flóttamannabúðirnar í Calais sem gengið hafa undir nafninu „Frumskógurinn“ eða „The Jungle“.

BBC greinir frá því að fulltrúar yfirvalda hafi byrjað að taka saman kofa og skýli í suðurhluta búðanna, en hafi látið þá kofa sem séu í notkun í friði.

Óeirðalögregla er á staðnum, en fram kemur að vatnsbyssur óeirðalögreglu hafi enn ekki verið notaðar.

Frönsk yfirvöld hyggjast flytja þá flóttamenn sem hafast við í Calais í sérstakar móttökustöðvar fyrir flóttamenn í bænum.

Fjöldi flóttafólks hafa síðustu mánuði dvalið í „Frumskóginum“ í þeirri von að komast áfram til Bretlands.

Talsmenn franskra yfirvalda segja um þúsund manns nú hafast við í „Frumskóginum“ þó að fulltrúar hjálparsamtaka segja fjöldann mun hærri.