Ræða hæfi ráðherra

Stórnskipunar- og eftirlitsnefnd mun í hádeginu í dag ræða aflandsfélög og hæfi ráðherra. Þetta kemur fram á vefsíðu Alþingis, en fjallað var um tengsl Sigmundar Davíðs Gunnlaugssonar forsætisráðherra við aflandsfélagið Wintris í Kastljósi á RÚV í gær.

Þar var greint frá því að Sigmundur Davíð hefði verið annar eigandi Wintris ásamt eiginkonu sinni, Önnu Sigurlaugu Pálsdóttur, allt þar til hann seldi henni helmingshlut sinn í félaginu á einn dollara á gamlársdag 2009, degi áður en ný skattalög sem sneru að aflandsfélögum tóku gildi.

Þingfundur hefst klukkan 15 í dag þar sem óundirbúnar fyrirspurnir eru á meðal dagskrárliða. Boðað hefur verið til mótmæla á Austurvelli klukkan 17 til að krefjast afsagnar forsætisráðherra vegna málsins en yfir 7000 manns hafa boðað komu sína.