Ásmundur: Ingólfur fer frjálslega með staðreyndir

Eins og fram kom á Vísi fyrr í dag er Ingólfur Sigurðsson á förum frá 1. deildarliði Fram. Ingólfur var kallaður á fund í gær þar sem honum var tjáð að hann þurfi að finna sér nýtt lið því hann þykir svo slæmur í hóp.

433.is greindi fyrst frá málinu en í samtali við vefsíðuna sakar Ingólfur Hlyn Atla Magnússon, samherja sinn, um að hafa grafið undan sér.

Ásmundur Arnarsson, þjálfari Fram, var í viðtali hjá Hirti Hjartarsyni í útvarpsþættinum Akraborginni á X-inu fyrir skemmstu þar sem hann skýrði sína hlið á málinu.

Ásmundur segir rétt að Ingólfur sé á förum frá Fram en það sé rangt að brotthvarf hans megi rekja til umkvartana Hlyns Atla.

„Þetta mál er einfaldlega þannig að leikmaður er tekinn á fund þar sem honum er tjáð að hann megi leita annað og best sé að klára málið strax með þeim hætti,“ sagði Ásmundur sem tók við þjálfun Fram í vetur.

„Við erum ekki alveg nógu ánægðir með spilamennsku liðsins en það er ekkert Ingólfi einum og sér að kenna. Hann hefur átt sína spretti og gert vel á köflum. Við erum að fara yfir sviðið og reyna að vega og meta hvað sé best fyrir liðið. Þetta er eitt af því.

„Ég legg það ekki í vana minn að tjá mig um einstaka leikmenn og persónuleg mál en það er alveg ljóst að maður tekur ekki svona ákvarðanir léttvægt. Þótt einn leikmaður kvarti yfir öðrum tekur maður ekki svona ákvarðanir út frá því. Ingólfur hefur fengið að vita nokkrar ástæður og hann kýs að kafa djúpt ofan í eina af þeim. Það er hans mál.“

En er eitthvað sannleikskorn í þeim fullyrðingum að Ingólfur sé erfiður í hóp?

„Ég ítreka bara það sem ég sagði áðan. Ég legg ekki í vana minn að bera persónuleg mál á borð í fjölmiðlum,“ sagði Ásmundur og bætti því við að Ingólfur færi ansi frjálslega með staðreyndir í þessu máli.

Ingólfur lék alls níu leiki með Fram í deild og bikar og skoraði í þeim eitt mark. Hann lék áður með KR, Val, Þrótti, KV og Víkingi Ó. hér á landi.

Fram er í 7. sæti Inkassodeildarinnar með þrettán stig eftir 10 umferðir.