Forstjóri MS: Ekki það sama ógerilsneydd mjólk til Mjólku og ógerilsneydd mjólk til KÚ

Ari Edwald forstjóri MS segir að ekki sé líku saman að jafna þegar MS seldi Mjólku 2 ógerilsneydda mjólk á lægra verði en mjólkurbúinu KÚ. Fyrir helgi var MS sektað um hálfan milljarð af Samkeppniseftirlitinu vegna verðlagningarinnar á mjólkinni. Ari segir að þrátt fyrir að um sömu vöru sé að ræða þá séu gjörólíkar aðstæður uppi við söluna í hvoru tilfelli fyrir sig og því sé í raun ekki verið að selja sömu vöruna.

„Sama varan getur verið ólík á ýmsum forsendum. Eitt flugsæti til annars í flugvél kosta ekki það sama. Samt er ekki verið að mismuna mönnum í því. Þú hefur Saga Class sæti eða eitthvað sem þú getur hreyft fram á síðasta dag eða hrært í og svo er fast sæti. Þeir sem taka þátt í samstarfi MS og tengdra aðila axla ábyrgð sem þeir gera ekki sem kaupa bara eftir hendinni það sem þeir vilja hverju sinni til að vinna úr þær vörur sem þeir vilja framleiða,“ sagði Ari í viðtali í Bítinu á Bylgjunni í morgun en Mjólka 2 var í samstarfi við MS um mjólkurframleiðslu.

Þannig sagði hann að MS og tengdir aðilar hafi skuldbindingu um að taka við allri mjólk, annast birgðastýringu og framleiða allar vörur, meðal annars þær sem ekki fæst kostnaðarverð fyrir.

„Þú sérð engan mun á flugsætinu sem þú borgar 30 þúsund kall fyrir og flugsætinu sem þú borgar 80 þúsund kall fyrir“

Aðspurður hvers vegna það hefði þó verið mismunandi verð fyrir sömu vöru sagði hann:

„Þú sérð engan mun á flugsætinu sem þú borgar 30 þúsund kall fyrir og flugsætinu sem þú borgar 80 þúsund kall fyrir. Það fer bara eftir einhverjum skilmálum í kringum það hvaða skuldbindingar þú hefur hvort þú getur hrært í því eins og þér sýnist. Ég skal nefna þér dæmi um hvernig þetta virkar. Ég var í Búðardal í kringum verslunarmannahelgi og þá hringir aðili sem er vanur að kaupa nokkur þúsund lítra af mjólk. Hann segir að hann ætli ekki að kaupa 4 þúsund lítra af mjólk í kringum verslunarmannahelgi vegna þess að hann ætli að gefa fólkinu sínu frí. Hann getur gert það og hefur frelsi til þess. Hann fær því ekki mjólkina og við sitjum uppi með hana,“ sagði Ari.

MS þurfti þá að koma mjólkinni í birgðageymslu annars staðar á landinu þar sem ekki var hægt að koma henni fyrir fyrir vestan. Það hafi verið kostnaður sem lenti á MS. Það sé ekki sami hluturinn að geta ákveðið sig dag frá degi hversu mikla mjólk viðkomandi kaupi af MS og því að vera í samstarfi við fyrirtækið.

Klaufaleg ummæli að segja að sektin lendi á neytendum

Þá segist Ari skilja reiði margra vegna ummæla hans um að sektin myndi falla á neytendur með hærra vöruverði.

„Mér þykir það leitt hvernig þessi ummæli komu út. Bæði var þetta klaufalega orðað hjá mér og svo fór þetta út án þess samhengis sem orðin voru sögð í sem er auðvitað það að ég er að ganga út frá því að það verði ekki lögð á okkur sekt.“

Það sé hins vegar þannig að komi til sektar þá muni hún annað hvort lenda á bændum eða neytendum.

Viðtalið við Ara má hlusta á í heild sinni í spilaranum hér að ofan.