„Það getur gert dembu á sunnudag og mánudag“

Litlar breytingar eru á veðurspánni fyrir daginn í dag og á morgun en á sunnudag má búast við skúrum sunnan- og vestanlands. Á mánudag má búast við enn meiri skúrum víða um land. 

„Það getur gert dembu á sunnudag og mánudag,“ segir Helga Ívarsdóttir, veðurfræðingur hjá Veðurstofu Íslands. Í dag og á morgun er enn spáð besta veðrinu á Suður- og Vesturlandi.

„Vestmannaeyjar koma mjög vel út í ár. Það er einna hægasti vindurinn á þeim slóðum,“ segir Helga en það á sér allt skýringar í lítilli lægðarbólu suður af landinu. 

„Í þessari norðanátt myndast oft lítil lægðarbóla fyrir sunnan land sem er eins og hlélægð. Hún myndast af því vindurinn þarf að fara fram hjá landinu og myndar smá drag. Og í þessari lægðarbólu, þar sem Vestmannaeyjar eru, er hægur vindur. Vindurinn mun hins vegar ná sér upp niður Húnaflóa og milli jöklanna á Suðurlandi,“ segir Helga. 

Þá er einnig von á fínu veðri í Reykjavík í dag og á morgun að sögn Helgu. „Sérstaklega á þeim slóðum sem eru í skjóli fyrir Esjunni.

Líkt og síðustu daga verður norðlæg átt ríkjandi í dag, einna hvassast austan til þar sem má reikna má með staðbundnum hviðum þvert á veg, allt að 25-30 m/s með ströndinni frá Lóni og austur á Reyðarfjörð og því best að fara með gát á þessu svæði. Að öðru leyti má búast við keimlíku veðri á landinu og var í gær.

Veðurhorfur á landinu næstu daga:

Í dag og á morgun:

Norðlæg átt, yfirleitt 5-13 m/s, hvassast A-ast og V-til. Að mestu léttskýjað S- og V-lands, súld eða dálítil rigning NA- og A-til, en annars úrkomulítið. Hiti 9 til 18 stig, hlýjast SV-lands.

Á sunnudag:

Fremur hæg norðaustlæg átt. Lítils háttar væta norðan- og austan til, en skýjað með köflum og skúrir sunnan- og vestanlands, einkum síðdegis. Hiti 6 til 16 stig, hlýjast suðvestan til.

Á mánudag:

Fremur hæg norðlæg eða breytileg átt og skúrir, einkum S- og V-lands. Hiti 8 til 16 stig.

Á þriðjudag, miðvikudag og fimmtudag:

Norðaustlæg átt, skýjað með köflum og skúrir á víð og dreif, einkum síðdegis. Hiti breytist lítið.