Bjóða starfsfólki sínu á Justin Bieber

„Það var ákveðið að fagna góðu sumri hjá WOW air með því að bjóða öllu starfsfólkinu okkar á tónleika með Justin Bieber. Þetta er búið að vera annasamt sumar, við höfum bætt við okkur áfangastöðum og viljum þakka starfsfólkinu fyrir.



Þetta eru um 650 manns en það eru einhverjir sem þurfa auðvitað að vinna, ekki förum við að leggja niður flug – þannig að ég veit ekki nákvæmlega hversu margir geta þegið boðið. WOW air er síðan auðvitað styrktaraðili tónleikanna,“ segir Svanhvít Friðriksdóttir, upplýsingafulltrúi WOW air.

Eins og alþjóð veit eru tónleikar Justins Bieber á næsta leiti, en þeir verða 8. og 9. september í Kórnum í Kópavogi. Miðarnir sem WOW air gefur starfsfólki sínu eru á tónleikana 9. september en á þá tónleika seldist upp á örskotsstundu í desember á síðasta ári og fengu færri miða en vildu. Því var brugðið á það ráð að halda aukatónleika. WOW air hefur því fengið að taka frá miða fyrir starfsfólk sitt og þá í skiptum fyrir að styrkja tónleikana.

Justin kemur við á Íslandi á leið sinni til Evrópu þar sem hann mun halda tónleika á nokkrum af stærstu tónleikastöðum álfunnar og halda um þrjátíu tónleika, meðal annars í Frakklandi, á Englandi og Spáni – stoppið á Íslandi er því það fyrsta í þessu risatónleikaferðalagi söngvarans.

Með poppstjörnunni, sem er ein sú vinsælasta í heimi, kemur stórt teymi af fólki úr bransanum auk þess sem Vic Mensa, ungur rappari á uppleið, mætir með kappanum og mun sjá um að hita fólkið upp áður en stórstjarnan kanadíska stígur á sviðið. Vic Mensa þessi hefur unnið með nokkrum af stærstu nöfnunum í tónlistarbransanum eins og til dæmis Íslandsvininum Kanye West, sem kom sjálfur hingað til lands fyrr á árinu til að taka upp tónlistarmyndband við lagið Highlights af plötu sinni The Life of Pablo.