Rakel Björk frumsýnir nýtt myndband á Vísi: Spurningarnar sem vakna eftir sambandslit

„Þetta er fyrsta lagið sem ég gef út en ég samdi það síðasta haust þegar ég var í söngnámi í Kaupmannahöfn í Complete Vocal Institute,“ segir Rakel Björk Björnsdóttir sem gefur í dag út nýtt myndband við lagið What if og frumsýnir Lífið það.

„Lagið fjallar um sambandsslit og þær spurningar sem vakna oft í kjölfarið. „Hvað ef ég hefði gert eitthvað öðruvísi?“

Kristinn Evertsson sá um útfærslu undirspilsins og upptökur lagsins.

„Ég var ótrúlega ánægð með samstarfið við hann. Við lögðum mikið upp úr einlægni í söngnum í upptökunum og vona ég að það komist til skila. Ég vann tónlistarmyndbandið ásamt góðum vinum mínum. Stefán Þór Þorgeirsson leikur á móti mér í myndbandinu. Árni Beinteinn sá um upptökur og klippingu, Jónas Alfreð Birkisson og Hákon Jóhannesson aðstoðuðu við upptökurnar, Sóley Björk Þorsteinsdóttir sá um förðun og Jakob Gabríel Þórhallsson litgreindi,“ segir Rakel.

Tökurnar stóðu yfir í þrjá daga. „Eftir tökurnar áttum við svo mikið efni að hægt hefði verið að gefa út nokkur mismunandi myndbönd við lagið. Á endanum tókst okkur að púsla þessu saman og erum við stolt af afrakstrinum. Þó komust ekki öll atriðin fyrir enda er lagið í styttri kantinum.“

Rakel stundar leiklistarnám við Listaháskóla Íslands.

„Ég hef brennandi áhuga á bæði söng og leiklist og hef fengið tækifæri til að spreyta mig í kvikmyndaleik á síðustu árum. Árið 2013 í kvikmyndinni Falskur fugl og í kvikmyndinni Þrestir sem kom út á síðasta ári. Ég er að fara á kvikmyndahátíð í Frankfurt, LUCAS International Film Festival, í næstu viku fyrir hönd Þrasta. Það eru spennandi tímar framundan.“

Hér má skoða Facebook-síðu Rakelar.