Rafpopp með áhrifum frá Eþíópíu

Nýlega kom út fyrsta plata hljómsveitarinnar Omotrack sem ber heitið Mono & Bright. Það eru bræðurnir Markús og Birkir Bjarnasynir sem skipa hljómsveitina og lýsa þeir tónlist sinni sem nokkurs konar rafpoppi.

„Lögin eru samin á gítar og píanó og yfirfærð yfir í rafstíl þar sem við notum hljóðgervla, rafgítar og trommuheila,“ segir Markús. Birkir bætir við að þeim sjálfum þyki erfitt að skilgreina tónlistarstefnu sína. „Við höfum þó við fengið ýmsar tillögur, t.d. raf-indie, lo-fi raf-rokk auk rafpoppsins.“ Markús spilar á gítar og syngur en Birkir spilar á píanó og hljómborð auk þess að syngja.

Hér má skoða á stutt kynningarmyndband vegna plötunnar sem inniheldur níu lög. 

Byrjuðu í rappinu

Þeir segjast hafa verið í ýmum hljómsveitum um ævina og samið tónlist frá því þeir muni eftir sér. „Við byrjuðum þriggja og fimm ára saman í rappsveit. Nú höfum við lokið við að semja og taka upp nýju plötuna okkar og má m.a. rekja nokkur laga hennar til rappáranna. Við vönduðum okkur mikið við upptökurnar og eyddum heilu dögunum saman í stúdíóinu. Við erum bræður, þannig það var mikið rifist og rökrætt til þess að fá rétta „soundið“. Það sem gerði síðan útslagið fyrir okkur var að fá til liðs við okkur frábæra blástursleikara, þau Grímu Katrínu Ólafsdóttur og Gunnar Kristinn Óskarsson sem spila á trompet og Pétur Örn Jónsson sem spilar á tenórsaxófón.“

Hér má skoða tvö myndbönd þeirra, við lögin Mono & Bright og Taxi.

Tenging milli mynda og texta

Hægt er að kaupa plötuna á tonlist.is og hún er væntanleg bráðlega inn á Spotify og iTunes. „Okkur langaði einnig að gefa plötuna út í áþreifanlegum umbúðum. Hún fæst því sem usb-lykill í fallegri öskju sem inniheldur litlar grafískar myndir, eina mynd við hvert lag. Myndirnar voru allar teknar í Eþíópíu, þar sem við ólumst upp, og er alltaf einhver tenging á milli myndar og texta hvers lags. Við erum ánægðir með útkomuna og höfum fengið góð viðbrögð hingað til.“

Bræðurnir ætla að fylgja plötunni eftir með ýmsum tónleikum og gerð frekari myndbanda. „Auk þess erum við að á fullu við að undirbúa útgáfutónleika sem verða í byrjun desember. Það er þó hægt að sjá okkur á tónleikum áður, t.d. spilum við á nokkrum „off venue“ viðburðum á Airwaves tónlistarhátíðinni í byrjun nóvember.

Hægt er að fylgjast með sveitinni á facebook og Instagram.