Kosningaspjall Vísis: Telur það ekki mistök að hafa farið í olíuleit á sínum tíma

Rósa Björk Brynjólfsdóttir oddviti Vinstri grænna í Suðvesturkjördæmi telur að það hafi ekki verið mistök hjá Steingrími J. Sigfússyni þáverandi atvinnuvegaráðherra og flokksbróður sínum að úthluta fyrstu sérleyfunum til olíuleitar á Drekasvæðinu þó að flokkurinn sé í dag andsnúinn olíuleit. Þetta kom fram í Kosningaspjalli Vísis í dag.

„Ég held að það hafi ekki verið mistök á þessum tíma, alls ekki. Ég held bara að frá því að þetta gerðist þá höfum við bara séð þróunina í loftslagsmálum vera með þeim hætti að við þurfum að grípa til róttækari aðgerða og það er eitthvað sem Vinstri græn vilja gera og tala fyrir, að við stígum styrkari skref í baráttunni gegn hlýnun loftslags og þetta er einn hlutur í því að við erum andsnúin olíuleit á Drekasvæðinu eins og staðan er í dag,“ sagði Rósa Björk. Hún sagði að á meðal þess sem flokkurinn vilji stefna að sé raforkuvæðing bílaflotans og græn innkaup hins opinbera.

Aðspurð um hvort það hefði verið rétt ákvörðun að fara í framkvæmdir vegna málmbræðslu á Bakka sem hófust einnig í tíð vinstristjórnarinnar sagði Rósa Björk:

„Það hefur verið umdeild ákvörðun í okkar röðum það verður að segjast eins og er. Það er staðreynd að sú ákvörðun var tekin vegna þess að fyrirætlanir voru um mun stærri orkufrekari iðnað á svæðinu á Bakka og miklu stærri og meira mengandi stóriðju. Þetta var leið til þess að hlýða kalli heimamanna um iðnað á þessu svæði en um leið ákall til þess að koma á minna mengandi iðnaði og mun minni í sniðum en upphaflegu fyrirætlanirnar voru. En um þetta hefur verið deilt í okkar röðum hvort að við sem flokkur sem kennum okkur við græna pólitíska stefnu eigum að standa fyrir því að veita leyfi fyrir orkuiðnaði.“

Skýrt að Vinstri græn vilji ríkisstuðning við matvælaframleiðslu

Eitt af umdeildari málum kjörtímabilsins voru nýsamþykktir búvörusamningar. Vinstri græn sátu hjá þegar samningarnir voru samþykktir á þingi í haust en Rósa Björk sagði flokkinn alltaf hafa haft skýra stefnu í landbúnaðarmálum, það er að vera fylgjandi ríkisstuðningu við matvælaframleisðlu.

„Við höfum alltaf verið fylgjandi ríkisstuðningi við matvælaframleiðslu, það er eitthvað sem við höfum alltaf verið mjög skýr með. Ástæðan að við sátum hjá var allur málatilbúnaður þessa máls og hversu lítið samráð var haft. Þess má líka geta að það var nokkuð stór hluti bænda sem var ekki sáttur við þennan búvörusamning nefni þar sauðfjárbændur og svínabændur en við höfum alltaf verið fylgjandi ríkisstuðningi í matvælaframleiðslu eins og allir kannski vita í raun og veru,“ sagði Rósa Björk.

Hún sagði að á bak við þessa stefnu væru meðal annars byggðasjónarmið en að Vinstri græn vildu ekki sjá svona stóra samninga gerða án þverpólitísks samráðs.

Þjóðin hafi síðasta orðið þegar kemur að aðildarviðræðum við ESB

Eins og kunnugt er hóf Ísland aðildarviðræður við Evrópusambandið í tíð ríkisstjórnar Vinstri grænna og Samfylkingarinnar. Aðspurð hvernig flokkurinn vill ljúka því ferli sagði Rósa:

„Við höfum ávallt talað fyrir því að þjóðin hafi síðasta orðið þegar kemur að aðildarviðræðum.“

Viljið þið fara í þjóðaratkvæðagreiðslu um það hvort það eigi að halda áfram aðildarviðræðunum eða ekki?

„Ég held að það væri skynsamlegt að við myndum líta á þá vinnu sem farið var í á síðasta kjörtímabili og bera það svo undir þjóðina þegar við erum búin að fara í þá vinnu sem var búið að vinna þá þegar.“

Ljúka þá samningi og fara í þjóðaratkvæði?

„Fara í þá vinnu aftur og bera það svo undir þjóðina.“