Hátíðartónleikar á vígsluafmæli

Mikið verður um dýrðir í Hallgrímskirkju í næstu viku þegar 30 ára vígsluafmælis Hallgrímskirkju verður minnst með margvíslegum hætti.

Meðal annarra viðburða verður tímamótanna minnst með stórglæsilegum tónleikum í dag kl. 19 og á morgun kl. 17. Hátíðlegur lúðraþytur og pákuslög ásamt glæsilegum söng og hljóðfæraslætti fylla hvelfingar Hallgrímskirkju þegar Mótettukór Hallgrímskirkju ásamt Alþjóðlegu barokksveitinni í Hallgrímskirkju (áður Den Haag) flytja glæsilegu hátíðarverkin Fanfare og Te Deum eftir Charpentier og Messu nr. 1 í F-dúr eftir J.S. Bach á hátíðartónleikum í tilefni af 30 ára vígsluafmæli Hallgrímskirkju, en kirkjan var vígð 26. október 1986.

Hljóðfæraleikararnir koma sérstaklega til landsins til að leika á þessum tónleikum og koma þeir m.a. frá París, Madrid, Lissabon, Sidney, Chicago, New York, London, München, Basel, Amsterdam og Kaupmannahöfn auk þess sem nokkrir Íslendingar sem hafa sérhæft sig í flutningi barokktónlistar leika með barokksveitinni.

Mótettukór Hallgrímskirkju hefur lengi verið meðal fremstu kóra Íslands. Verkefnalisti kórsins er langur og fjölskrúðugur. Þar má finna fjölmargar óratóríur, passíur og sálumessur en líka kórverk án undirleiks frá ýmsum tímum, auk þess sem kórinn hefur frumflutt fjölda íslenskra tónverka. Mótettukórinn hefur farið í margar tónleikaferðir og sungið í helstu dómkirkjum Evrópu og tekið þátt í listahátíðum hér á landi sem erlendis.

Einsöngvararnir hafa allir tengst listastarfi Hallgrímskirkju um árabil og eru þrír þeirra m.a. meðlimir í Schola cantorum. En einsöngvarar á tónleikunum verða þau Sigríður Ósk Kristjánsdóttir mezzosópran, Auður Guðjohnsen alt, Oddur A. Jónsson bassi, Thelma Sigurdórsdóttir sópran og Guðmundur Vignir Karlsson tenór og stjórnandi er Hörður Áskelsson. Það verður því sannkölluð hátíðarstemning í Hallgrímskirkju um kosningahelgina.



Greinin birtist fyrst í Fréttablaðinu 29. október.