Einar K. segir forsætisnefnd ekki hafa vitað af ákvörðun kjararáðs

Einar K. Guðfinnsson forseti Alþingis á seinasta kjörtímabili segir að hvorki hann né forsætisnefnd þingsins hafi vitað af hækkun kjararáðs á launum þingmanna, ráðherra og forseta Íslands sem samþykkt var síðastliðinn laugardag. Ákvörðunin hefur vakið mikla reiði í samfélaginu en meðal annars var samþykkt að þingfararkaup þingmanna myndi hækka um 44 prósent, eða úr 762.940 krónum í 1,1 milljón.

Í frétt á vef DV er fjallað um ummæli Sigríðar Á. Andersen þingmanns Sjálfstæðisflokksins Morgunútvarpi Rásar 2 í morgun um að formenn allra flokka á þingi hefðu vitað fyrir kosningar af því að hækka ætti launin og að málið hefði meðal annars verið kynnt fyrir forsætisnefnd.

Bjarni Benediktssson formaður Sjálfstæðisflokksins sagði í samtali við fjölmiðlamenn í dag að hann hefði ekki vitað af hækkuninni og í samtali við Vísi segir Sigríður að hún hafi  verið að vísa í bréf forseta Alþingis til kjararáðs í október í fyrra. Þá hafi hún verið að vísa í að málið hafi verið tekið fyrir í forsætisnefnd í fyrra og flokkarnir hafi því vitað af því að kjararáð væri að með launakjör þingmanna og ráðherra til skoðunar. 

Lítur ekki á þingforseta sem verkalýðsleiðtoga þingmanna

Í samtali við Vísi segir Einar einmitt að í október í fyrra hafi kjararáð skrifað forsætisnefnd bréf.

„Það var efnislega á þá leið hvort við vildum koma einhverju sérstöku á framfæri því þeir væru að fjalla um mál þeirra sem heyrðu undir kjararáð. Við tókum málið fyrir forsætisnefnd og það er allt rakið í úrskurði kjararáðs en okkar niðurstaða var sú að þetta væri bara mál ráðsins og að við myndum ekki kom að því enda lít ég ekki þannig á að forseti Alþingis sé einhver verkalýðsleiðtogi þingmanna,“ segir Einar.

Hann bætir við að það sem forsætisnefnd hafi lagt áherslu á, og komi fram í úrskurðinum, að „almennt sé æskilegt að úrskurðir kjararáðs um launakjör alþingismanna séu kveðnir upp sem fyrst eftir að niðurstöður kjarasamninga á almennum vinnumarkaði og hjá hinu opinbera liggi fyrir,“ eins og segir í úrskurði kjararáðs. 

Þannig hafi hvorki hann né forsætisnefnd haft önnur afskipti af málinu en í sæti í forsætisnefnd eiga forseti Alþingis og varaforsetar sem eru sex talsins. Því segir Einar að forsætisnefnd hafi ekki verið kunnugt um hækkunina sem ráðið samþykkti á laugardaginn.

„Okkur var ekkert kunnugt um það og ég hafði ekki hugmynd um það. Kjararáð leitaði að minnsta kosti ekki til mín sem þingforseta meir um þetta mál og það var meðvituð ákvörðun mín og forsætisnefndar að hafa engan atbeina að þessu máli að öðru leyti en því sem er rakið í úrskurðinum.“

Mun óska eftir upplýsingum frá forsætisnefnd

Jón Þór Ólafsson þingmaður Pírata sem áttu áheyrnarfulltrúa í forsætisnefnd á seinasta kjörtímabili segir í samtali við Vísi að hann ætli að kalla eftir upplýsingum frá forsætisnefnd varðandi það hvernig fjallað var um málið í nefndinni. 

Hann muni meðal annars kalla eftir fundargerðum til að draga fram hver vissi hvað. 

Þá segir hann jafnframt að Píratar séu að skoða hvernig Alþingi geti beitt sér fyrir því að hækkunin verði afturkölluð, eins og verkalýðsfélögin hafa meðal annars verið að kalla eftir. 

„Það er mikilvægt að Alþingi aftengi þessa sprengju,“ segir Jón Þór.