Sjáðu myndirnar frá því þegar sex hundruð KR-ingar og Vesturbæingar héldu þorrablót

Vesturbæingar héldu þorrann hátíðlegan með blóti á laugardagskvöldið. Ekki hefur farið mikið fyrir þorrablótum í vesturbænum undanfarin ár en segja má að það hafi verið lognið á undan storminum. Sex hundrað miðar voru pantaðir innan við sólarhring frá því að blótið var auglýst.

KR-ingar og Vesturbæingar af öllum kynslóðum voru mættir á blótið. Þar mátti sjá heiðursmenn á borð við Svein Jónsson og Ellert B. Schram. Þar voru einnig leikmenn úr karla- og kvennaliðum KR í knattspyrnu, núverandi og fyrrverandi auk maka, vina og annarra með svart og hvítt blóð í æðum. 

Gummi Ben var veislustjóri, Ari Eldjárn fór með gamanmál og þá spilaði Baggalútur fyrir dansi. Gullfoss og Geysir héldu svo uppi stuðinu fram á nótt.

Að sögn Þórhildar Garðarsdóttur, eins skipuleggjanda blótsins, tókst það virkilega vel og synd að ekki var hægt að selja fleiri miða á blótið í ár. Ljóst sé að þorrablót KR er komið til að vera.

Erling Ó. Aðalsteinsson, KR-ingur með meiru, tók myndirnar sem fylgja fréttinni.