Eigandi kranans í Bæjarlind sinnti ekki fyrirmælum um að taka hann niður

„Kraninn stendur uppréttur enn þá,“ segir Gunnar Hilmarsson, aðalvarðstjóri hjá lögreglunni á höfuðborgarsvæðinu, um byggingarkranann ótrausta sem varð þess valdandi að lögreglan ákvað að loka fyrir umferð í Bæjarlind í Kópavogi.

Ástæðan er byggingarkrani sem talið er að hætta stafi af, en opnað verður fyrir umferð að nýju þegar veður tekur að lægja.

Gunnar segir að um sé að ræða sama krana sem varð þess valdandi að loka þurfti fyrir umferð í Bæjarlind í Kópavogi í hvassviðrinu 8. febrúar síðastliðinn.

„Veðrið mun ná hámarki klukkan eitt og við opnum götuna um leið og veðrinu slotar,“ segir Gunnar. „Kraninn er ekki í lagi, þess vegna lokum við,“ segir Gunnar.

Hann segir eiganda kranans hafa fengið fyrirmæli um að taka kranann niður sem hann sinnti ekki.

Gunnar segir vinnueftirlitið hafa mál eiganda byggingarkranans á sínum snærum. „Þetta er mjög bagalegt því þetta er verslunarhverfi,“ segir Gunnar.