Snjórinn byrjar ekki að bráðna að ráði fyrr en eftir helgi

Ekki er von á neinni hláku um helgina á suðvesturhorninu samkvæmt upplýsingum frá vakthafandi veðurfræðingi á Veðurstofu Íslands en enn er nokkuð mikið af snjó á höfuðborgarsvæðinu eftir ofankomuna um liðna helgi.

Það hlýnar nefnilega ekki mikið fyrr en eftir helgina og gæti snjórinn því byrjað að bráðna þá en um helgina verður hiti í kringum frostmark þar sem víða verður frostlaust við ströndina á sunnudag en vægt frost inn til landsins.

 

„Þetta verður rólegheita austanátt bæði á morgun og á sunnudag. Síðan á mánudag verður frostlaust og fer yfir í smá rigningu eða slyddu hér suðvestan til og einnig á þriðjudag en þetta er engin átakalægð og henni fylgir ekkert hvassviðri,“ segir Björn Sævar Einarsson, vakthafandi veðurfræðingur.

Um helgina gæti svo orðið nokku kalt inn til landsins norðanlands þar sem frost nær hugsanlega 12 stigum og þá verður hægt vaxandi austan átt á morgun þar sem vindur gæti farið í 15 metra á sekúndu allra syðst með éljagangi suðastan og austanlands.

Veðurhorfur í dag og næstu daga:

Fremur hæg austlæg eða breytileg átt og léttskýjað að mestu. Skýjað eða skýjað með köflum um landið norðaustanvert og dálítil él, einkum við norðausturströndina. Frost 2 til 12 stig, en hiti sums staðar yfir frostmarki við sjávarsíðuna yfir hádaginn. Hægt vaxandi austanátt á morgun, 8-15 síðdegis, hvassast syðst. Dálítil él suðaustan- og austanlands, en annars bjartviðri. Minnkandi frost.

Á laugardag:

Hægt vaxandi austanátt, 8-15 m/s síðdegis, hvassast allra syðst. Dálítil él við suður- og austurströndina, annars bjartviðri. Dregur úr frosti.

Á sunnudag:

Norðaustlæg átt 8-15 m/s, hvassast við suðaustur- og austurströndina. Dálítil snjókoma og síðar slydda austantil á landinu, en þykknar upp vestantil. Víða frostlaust við ströndina, en vægt frost til landsins.

Á mánudag:

Austan og norðaustan 5-13 m/s. Slydda eða rigning sunnan- og austantil, él á Vestfjörðum, en annars þurrt að mestu. Hiti 0 til 5 stig, en sums staðar vægt frost í innsveitum.

Á þriðjudag:

Suðaustlæg átt og væta með köflum, en norðaustanátt og dálítil él norðvestantil. Kólnar lítið eitt.

Á miðvikudag:

Útlit fyrir vaxandi norðanátt með snjókomu um landið norðvestanvert. Annars hægari vindur og úrkomulítið. Kólnandi veður.