Gjaldkera björgunarfélags vikið frá störfum eftir að hafa brugðist trausti félaga sinna

Gjaldkera Björgunarfélags Árnesinga hefur verið vikið frá störfum vegna misnotkunar á fjármunum félagsins. Greint var fyrst frá málinu á vef DFS á Suðurlandi þar sem vitnað er í yfirlýsingu frá björgunarfélaginu en þar segir að málinu hafi verið vísað til lögreglu sem fer með rannsókn þess.

Í tilkynningunni segir að gjaldkerinn hafi viðurkennt að hafa nýtt viðskiptakort félagsins til kaupa á eldsneyti til eigin nota.

Líta félagar í Björgunarfélagi Árborgar málið alvarlegum augum og harma að gjaldkerinn fyrrverandi hafi brugðist trausti þeirra með þessum hætti.

Reikningar félagsins síðustu ára verða nú skoðaðir gaumgæfilega og málið unnið í samvinnu við Slysavarnafélagið Landsbjörg og lögmann þess.