Leitinni að Arturi verður framhaldið í dag

Leitinni að Arturi Jarmoszko, 26 ára karlmanni, verður framhaldið í dag. Lögregla og björgunaraðilar munu funda um stöðu mála í hádeginu og verða þá teknar ákvarðanir um næstu skref.

Þyrla Landhelgisgæslunnar mun taka þátt í leitinni auk björgunarsveita, kafbáts og dróna. Gert er ráð fyrir að leitað verði á svipuðum slóðum og í gær, eða frá Nauthólsvík að Kópavogshöfn.

Vonast er að hægt verði að þrengja leitarsvæðið þegar lögregla hefur aflað gagna úr tölvu Arturs. Þau gögn liggja hins vegar ekki  fyrir að svo stöddu, að sögn Guðmundar Páls Jónssonar, lögreglumanns sem stýrir rannsókninni.

Arturs hefur verið saknað frá mánaðamótum. Málið er rannsakað sem mannshvarf og ekki er grunur um saknæmt athæfi.