Allir með á síðustu æfingunni í Parma

Engin forföll voru á æfingu íslenska landsliðsins sem æfði í síðasta sinn á Ennio Tardini-leikvanginum í Parma í hádeginu í dag. Að sögn Helga Kolviðssonar, aðstoðarlandsliðsþjálfara, eru allir klárir í slaginn fyrir leikinn gegn Kósóvó á föstudag.

„Við höfum ekki heyrt neitt [um meiðsli]. Það voru allir með í gær og allt leit mjög vel út. Nú eru það bara síðustu skref undirbúningsins fyrir leikinn,“ sagði Helgi við Vísi fyrir æfinguna í dag.

Þó nokkuð mikið er um forföll í íslenska liðinu en Helgi segir að þjálfarateymið sé búið að skoða mögulegar lausnir við því. En fyrst og fremst sé gott að fá alla saman og að þessir þrír dagar í Parma hafi reynst góðir.

„Það var gott að nýta þessa daga til að fá heildarmynd af hópnum - hitta alla leikmenn og tala við þá. Leikmenn koma hver úr sinni átt og það er mikilvægt að við sköpum okkar eigið umhverfi. Það er okkar verkefni.“